‘राम नाम सत्य’ को धागोले बाटेको गीत टिकटकमा भाइरल

२२६ पटक पढिएको

फिल्म ‘राम नाम सत्य’को गीत ‘धागोले बाटेको’ टिकटकमा भाइरल भएको छ । दुई सातामै यो गीतमा झन्डै तीन लाख टिकटक भिडियो बनेकोले यसले ब्यापक भ्युज बटुलेको छ। युट्युबमा झण्डै २२ लाखभन्दा बढीले गीत हेरिसकेका छन् ।

गीतलाई प्रतिक्रिया पनि निकै उत्साहजनक मिलेको छ । दर्शकहरूले गीत मन पराएपछि निर्देशक माइकल चन्द उत्साहित देखिन्छन् । ‘निर्वाचनको छेकोमा हामीले गीत सार्वजनिक गर्दा धेरैले गलत समयमा गरियो भनेका थिए । तर, गीत सफल हुनेमा हामी विश्वस्त थियौं । आज धेरै दर्शकको मुखमा गीत झुन्डिएको छ । लाखौंको संख्यामा टिकटक बनेका छन् । यसले हामीलाई उत्साहित बनाएको छ उनले भने।

रोमान्टिक शैलीको यो गीतमा धन बहादुर गिरी (बाबुल) र रचना रिमालको स्वर, डा. डीआर उपाध्यायको शब्द तथा गायक गिरी स्वयंको संगीत रहेको छ । सियोन श्रेष्ठको कोरियोग्राफीमा तयार भएको गीतको भिडियोमा फिल्मका मुख्य जोडी विराज भट्ट र सुपुष्पा भट्टलाई देख्न सकिन्छ । दर्शकहरूले उनीहरूको केमेस्ट्री निकै रुचाएका छन् ।

आगामी चैत २७ गतेबाट प्रदर्शन हुने यस फिल्ममा विराज र सुपुष्पासहित सुशील श्रेष्ठ, दिव्या रायमाझी, आयुष सिंह ठकुरी, स्व. सुनिल थापा, प्रशान्त ताम्राकार, कनिज कोइराला, दिनेश डीसी लगायतका कलाकारहरूको अभिनय देख्न सकिनेछ । फिल्ममा उपेन्द्र शाही र स्वेता विमली निर्मातामा छन् भने कार्यकारी निर्माताहरू किशोर भट्ट, राजेन्द्र भट्ट र अर्जुन सुनार हुन् ।