बाग्मती प्रदेशमा सडक दुर्घटनामा परि १ हजार ५३० जनाको मृत्यु

१२८ पटक पढिएको

चितवन। पूर्वी चितवनको खैरहनीमा बिहीबार बोलेरो जिपले स्कुटरलाई ठक्कर दिँदा ३० वर्षीय युवकको मृत्यु भयो।

यसरी सडक दुर्घटनामा ज्यान गुमाउनेको संख्या धेरै छ। पछिल्ला साढे चार वर्षमा बागमती प्रदेशमा पाँच हजार दुई सय १३ सवारी दुर्घटना हुँदा एक हजार पाँच सय ३० जनाको ज्यान गएको छ। पछिल्लो ६ महिनामा एक सय २८ जनाको सडक दुर्घटनामा मृत्यु भएको जानकारी बागमती प्रदेश ट्राफिक प्रहरी कार्यालय रामनगरले दिएको छ।

बागमती प्रदेशका १० वटा जिल्लामा सवारी दुर्घटनाका कारण बर्सेनि साढे दुई सय देखि चार सयजनाको मृत्यु हुने गरेको छ। बागमती प्रदेश ट्राफिक प्रहरीको तथ्यांकअनुसार गत आर्थिक वर्षमा भएका एक हजार एक सय १० सवारी दुर्घटनामा दुई सय ५२ जनाको ज्यान गएको छ भने एक हजार सात सय ५० जना घाइते भएका छन्।

बागमती प्रदेशमा सडक दुर्घटनामा आर्थिक वर्ष २०७८/७९ मा चार सय १३, आव २०७७/७८ मा तीन सय ३५ र आव २०७६/७७ मा चार सय ४ जनाको मृत्यु भएको तथ्यांक ट्राफिक प्रहरीसँग छ। नागरिक दैनिक