हुस्सु र शितलहरले नारायणगढ-बुटबल सडक अवरुद्ध

रामकुमार श्रेष्ठ,नवलपरासी– बाक्लो हुस्सु र शितलहका कारण पूर्व–पश्चिम राजमार्ग अन्तर्गतको नारायणगढ–बुटबल सडक खण्ड अवरुद्ध भएको छ ।

नवलपरासीको बर्दघाट नगरपालिका ४ खुर्सानी खोलामा बाक्लो हुस्सु लागेको र शितलहर पनि चलेकाले बाटो चिप्लो हुँदा सडक अवरुद्ध भएको जिल्ला प्रहरी कार्यालय नवलपरासीका प्रहरी नायव उपरीक्षक रमेश बोहोराले जानकारी दिए ।

राती साढे एक बजेदेखि बाटो दुईतर्फी नै अवरुद्ध हुँदा दुई सय ५० भन्दा बढी सवारी साधन जाममा परेको प्रहरी नायव उपरीक्षक बोहोराले बताए । चिप्लो बाटोका कारण ठूला र मालवाहक सवारी साधान सञ्चालनमा निक्कै कठिनाई भएको प्रहरीले जनाएको छ ।

सवारी सधानको सहज आवागमनका लागि प्रयास भइरहेको भए पनि कठिनाइ भएको बोहोराले बताउ ।

पुस लागेदेखि नै तराईका जिल्लाहरुमा बिहान अवेरसम्म नै बाक्लो हुस्सु र शितलहर चल्ने गरेको छ । यसको असर बृद्धबृद्धा, बालबालिकादेखि यातायातमा पनि परेको छ ।