अङ्कुरम् एकेडेमीमा समुदायलक्षित वृहत् आँखा शिविर सम्पन्न

चितवन । विश्व नेत्र विशेषज्ञ दिवसको अवसर पारी भरतपुर–७, कृष्णपुरस्थित अङ्कुरम् एकेडेमीको आयोजनामा समुदायलक्षित वृहत् आँखा शिविरको आयोजना गरिएको छ ।

भरतपुर आँखा अस्पतालको प्राविधिक सहयोगमा सम्पन्न उक्त शिविरमा तीन सय ५६ जनाको आँखा जाँच गरिएको छ ।

विद्यालयको नियमित क्रियाकलापअन्तर्गत आयोजित आँखा शिविरमा कक्षा ११ र १२ मा अध्ययनरत २८९ विद्यार्थीको तथा ११ जना कर्मचारीको आँखा जाँच गरिएको थियो । त्यसै सामाजिक उत्तरदायित्वअन्तर्गत ५० वर्ष उमेर पुगेका ५६ जना स्थानीय समुदायका वृद्धवृद्धाको समेत आँखा जाँच गरिएको विद्यालयका स्वास्थ्य तथा कल्याण निर्देशक सरला पौडेलले जानकारी दिइन् ।

आँखा जाँच गरिएका समुदायका १० जना वृद्धवृद्धामा मोतियाबिन्दुको समस्या देखिएको छ । आँखा जाँच गरी ‘रिफर’ गरिएका उनीहरुको भरतपुर आँखा अस्पतालमा छूटसहित शल्यक्रिया गर्ने व्यवस्था मिलाइएको उनले बताइन् ।

त्यस्तै, ३६ जना विद्यार्थीलाई चस्मा लगाउन सिफारिस गरिएको र तीमध्ये छ जना विद्यार्थीलाई थप उपचारका लागि भरतपुर अस्पतालमै सिफारिस गरिएको नेत्र सहायक राजेश घिमिरेले जानकारी दिए ।

यो दिन हरेक वर्ष ८ अगष्टका दिन आँखा र दृष्टि हेरचाहमा विशेषज्ञता हासिल गरेका नेत्र रोग विशेषज्ञहरुको योगदानलाई सम्मान गर्ने दिन पनि हो । यस दिनको मुख्य उद्देश्य आँखासम्बन्धी स्वास्थ्यको मह¤व र दृष्टि हानि तथा अन्धोपन रोक्नका लागि नेत्र रोग विशेषज्ञहरुको महत्त्वपूर्ण भूमिकाको बारेमा समाजमा जागरुकता फैलाउनु समेत हो ।

भरतपुर आँखा अस्पतालका प्रमुख चिकित्सा निर्देशक डा. पुष्पा गिरी श्रेष्ठ संयोजन तथा नेत्र सहायक राजेश घिमिरे नेतृत्वको पाँच सदस्यीय टोलीले आँखा शिविर सञ्चालन गरेको हो ।