शुद्धोधन गाउँपालिका उपाध्यक्ष चौधरी र एमआइएस अपरेटरविरुद्ध भ्रष्टाचार मुद्दा

५३ पटक पढिएको

काठमाडौँ- अख्तियार दुरुपयोग अनुसन्धान आयोगले कपिलवस्तुको शुद्धोधन गाउँपालिका उपाध्यक्ष होमप्रकाश चौधरी कुर्मी र तत्कालीन एमआईएस अपरेटर सुरेश कँहारविरुद्ध विशेष अदालतमा भ्रष्टाचार मुद्दा दायर गरेको छ।

गाउँपालिकामा जागिर लगाइदिने भन्दै घुस लिएको उजुरीमाथि अनुसन्धान गर्दा उपाध्यक्षको बैंक खातामा पाँच लाख रुपैयाँ जम्मा भएको पुष्टि भएपछि आरोपपत्र दायर गरिएको आयोगले जनाएको छ।

अनुसन्धानका क्रममा कार्यक्रम सञ्चालनका लागि लिएको पेश्की रकममध्ये पाँच लाख रुपैयाँ उपाध्यक्षको खातामा जम्मा गरिएको र उक्त रकम घुसस्वरूप उपलब्ध गराइएको देखिएको आयोगले जनाएको छ।

आयोगले दुवै जनाविरुद्ध पाँच लाख रुपैयाँ बिगो, कैद, जरिवाना तथा रकम जफतको मागदाबीसहित मुद्दा दायर गरेको उसले जनाएको छ।