अर्थमन्त्री डा. वाग्ले स्वदेश फिर्ता

२५ पटक पढिएको

काठमाडौँ अर्थमन्त्री डा स्वर्णिम वाग्ले तीनदिने भारत भ्रमण सम्पन्न गरी स्वदेश फर्किनुभएको छ ।

भारत सरकारको निमन्त्रणामा बिहीबार छ सदस्यीय प्रतिनिधिमण्डलको नेतृत्व गर्दै अर्थमन्त्री डा वाग्ले तीनदिने औपचारिक भ्रमणका लागि नयाँदिल्ली प्रस्थान गर्नुभएको थियो । भ्रमणका क्रममा उहाँ भारतका मन्त्रीस्तरीय दुई भेटवार्ता, एक कूटनीतिक, एक सामाजिक, एक आर्थिक–व्यावसायिक र एक प्राज्ञिक मञ्चमा प्रमुख अतिथिका रूपमा सहभागी भएर आज स्वदेश फर्कनुभएको उहाँको सचिवालयले जनाएको छ ।

भ्रमणका क्रममा रसुवामा गएको भोटेकोशी बाढीपछिको उद्धार र राहतमा भारत सरकारले पुर्याएको सहयोगप्रति नेपाल सरकारका तर्फबाट भारत सरकारलाई धन्यवाद ज्ञापन गरिएको अर्थमन्त्री डा वाग्लेले बताउनुभयो । साथै, बाढीपछिको पुनर्निर्माणमा भारतसँग थप सहयोग र सहकार्यको प्रस्ताव गरिएको र दुई देशबीचको राजनीतिक, आर्थिक तथा कूटनीतिक सहकार्यलाई नयाँ ढङ्गबाट अघि बढाउने विषयमा पनि भेटघाट फलदायी भएको उहाँको भनाइ छ ।

बिहीबार उहाँले भारतीय समकक्षी निर्मला सीतारमणसँग भेटवार्ता गर्नुभएको थियो । भेटमा नेपाल–भारत आर्थिक सहकार्यका आयामहरूप्रति मन्थन भएको थियो । शुक्रबार उहाँ पूर्वविदेशसचिव श्यामशरणले आयोजना गर्नुभएको उच्चस्तरीय कूटनीतिक संवाद कार्यक्रममा प्रमुख अतिथिका रूपमा सहभागी हुनुभएको थियो ।

त्यसै दिन उहाँले भारतीय विदेशमन्त्री डा एस जयशङ्करसँग भेटवार्ता गर्नुभएको थियो । सोही दिन साँझ भारत व्यापार संम्बर्धन सङ्गठनका अध्यक्ष जावेद असरफले आयोजना गर्नुभएको बृहत् भेटघाट कार्यक्रममा पनि अर्थमन्त्री डा वाग्ले सहभागी हुनुभएको थियो । सोही दिन दिउँसो उहाँले प्रवासी नेपालीहरूको एक प्रतिनिधिमण्डलसँग भेट गर्नुभएको थियो ।

शनिवार बिहान संविधान दिवसका अवसरमा नेपाली राजदूतावासमा आयोजित कार्यक्रममा पनि अर्थमन्त्री डा वाग्ले सहभागी हुनुभएको थियो । आजै उहाँले भारतीय उद्योग परिसङ्घले आयोजना गरेको प्रतिष्ठित औद्योगिक घरानाहरूसँगको सम्मेलनमा प्रमुख वक्ताका रूपमा सहभागिता जनाउनुभएको थियो । आजै उहाँ दिल्ली स्कुल अफ इकोनोमिक्सले आयोजना गरेको विकास अर्थनीतिबारेको प्राज्ञिक छलफलमा प्रमुख अतिथिका रूपमा सहभागी हुनुभएको थियो ।