देशका अधिकांश स्थानमा मध्यम बर्षा हुने

१९ पटक पढिएको

काठमाडौँ । जल तथा मौसम विज्ञान विभाग अन्तर्गत मौसम पूर्वानुमान महाशाखाले हाल देशभर मनसुनी वायुको प्रभाव रहेको र हाल मनसुनको न्यून चापीय रेखा पूर्वतर्फ सरदर स्थानको आसपास तथा पश्चिम मा सरदर स्थानभन्दा उत्तरतर्फ नेपालको नजिक रहेको जानकारी दिएको छ ।

हाल कोशी, बागमती, कर्णाली र सुदूरपश्चिम प्रदेश साथै गण्डकी र लुम्बिनी प्रदेशको हिमाली र पहाडी भू-भागमा साधारणतया बादल लागेको छ । मधेश प्रदेश साथै गण्डकी र लुम्बिनी प्रदेशका तराई भू-भागमा आंशीक बादल लागेको छ । कोशी, बागमती र लुम्बिनी प्रदेशका केहि स्थान तथा कर्णाली र सुदूरपश्चिम प्रदेशका थोरै स्थान र गण्डकी प्रदेशका एक-दुई स्थानमा मध्यमसम्मको पानी परिरहेको छ ।

आज दिउँसो देशभर साधारणतया बादल लाग्नेछ । देशका हिमाली र पहाडी भू-भागका केही स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ । लुम्बिनी र सुदूरपश्चिम प्रदेशको तराई भू-भागका केही स्थान तथा मधेश प्रदेश साथै कोशी, बागमती र गण्डकी प्रदेशका  तराई भू-भागका थोरै स्थानमा मेघगर्जन/चट्याङ्ग सहित मध्यमसम्मको वर्षाको सम्भावना छ। बागमती, गण्डकी र कर्णाली प्रदेशका पहाडी भू-भाग, लुम्बिनी प्रदेशको पहाडी र तराई भू-भागका  एक-दुई  स्थानमा भारी वर्षाको सम्भावना छ ।

त्यस्तै आज राति देशका हिमाली र पहाडी भू-भागमा साधारणतया बादल लाग्नेछ । देशको तराई भू-भागमा  आंशीक बादल लाग्नेछ । देशका हिमाली र पहाडी भू-भागका केहि स्थानमा मेघगर्जन/चट्याङ्ग सहित मध्यमसम्मको वर्षा/हिमपातको सम्भावना छ ।  गण्डकी, लुम्बिनी र  सुदूरपश्चिम प्रदेशका तराई भू-भागका थोरै स्थान साथै मधेश  प्रदेश  तथा  कोशी र बागमती प्रदेशका  तराई भू-भागका  एक-दुई स्थानमा  मेघगर्जन/चट्याङ्ग सहित मध्यमसम्मको वर्षाको सम्भावना छ। बागमती,  गण्डकी र  कर्णाली प्रदेशका पहाडी  भू-भागका  एक-दुई  स्थानमा भारी वर्षाको सम्भावना छ ।