खाद्य स्वच्छताका आधारमा होटल रेष्टुरेन्टलाई गरिने स्तरीकरण कार्यक्रम सम्पन्न

३३ पटक पढिएको

खाद्य प्रविधि तथा गुण नियन्त्रण डिभिजन कार्यालय, दमौली, तनहुँको आयोजना तथा नवलपुर होटल व्यवसायी संघको सहयोगमा खाद्य स्वच्छताका आधारमा होटल रेष्टुरेन्टलाई गरिने स्तरीकरण कार्यक्रम सम्पन्न भएको छ।

आज नवलपरासी (ब.सू.पूर्व) जिल्लाका अमलटारी, देवचुली, मध्यविन्दु, विनयीत्रिवेणीका चितवन राष्ट्रिय निकुञ्ज मध्यवर्ती क्षेत्रमा संचालित जंगल रिसोर्ट, मैलिकालिका क्षेत्रमा संचालित इला कम्फोर्ट, मिराया लगायत रिसोर्ट प्रकारका होटल व्यवसायमा “खाद्य स्वच्छताका आधारमा होटल रेष्टुरेन्टलाई गरिने स्तरीकरण कार्यक्रम” पूर्वको अभिमुखीकरण तालिम सम्पन्न भएको छ।

हिमालयन चितवन सेन्चुरी रिसोर्टमा संचालित कार्यक्रममा वडा नं.१७ का वडाध्यक्ष चुडामणी थनेतको प्रमुख आतिथ्यता, वडा नं. १० का वडाध्यक्ष टेक नारायण महतोको विशेष आतिथ्यता, कावासोती नगरपालिका पर्यटन शाखाका फोकल पर्सन राम बराल, पर्यटन व्यवसायी डि.बी. चौधरी, नवलपुर होटल व्यवसायी संघका जिल्ला अध्यक्ष सन्तोष राना मगर, वरिष्ठ उपाध्यक्ष एम प्रसाद न्यौपाने, होमस्टे महासंघ गण्डकी प्रदेश अध्यक्ष धनीराम गुरौ, नवलपुर पर्यटन समितिका अध्यक्ष फन्सराम महतो, खाद्य प्रविधि तथा गुण नियन्त्रण कार्यालय पोखराका खाद्य निरीक्षण अधिकारी अशोक गौतम, खाद्य डिभिजन दमौलीका खा.नि.अ सन्तोष थापा मगर, आयोजक रिसोर्टका महाप्रबन्धक अजित विक्रम राना लगायतको रहेको थियो।

कार्यक्रमको संचालन खा.नि.अ सन्तोष थापा मगरबाट, स्वागत एम प्रसाद न्यौपानेबाट, कार्यक्रम माथि प्रकाश खाद्य डिभिजन दमौलीका प्रमुख ज्योति आचार्यबाट भएको थियो।

कार्यक्रममा होटल स्तरीकरणको लागि आवश्यक पर्ने ५० बुँदाको मापदण्डहरुको प्राविधिक व्याख्या विश्लेषण अशोक गौतम सरबाट भएको थियो जसमा व्यवसायीले आफ्नो व्यवसायको किचनमा कस्तो भौतिक संरचना बनाउनु पर्ने, सरसफाइ कति सम्म चाहिने, केके अभिलेख कसरी राख्ने भन्नेबारे विस्तृत कक्षा प्रस्तुती भएको थियो।

यसै क्रममा यस तालिम पछी हुने स्तरीकरण अभियानको स्थानीय खाद्य स्वच्छता समितिको संयोजकमा श्री सन्तोष राना मगर सर्वसम्मत रुपमा चयन हुनुभएको छ भने जनप्रतिनिधिमा वडा नं १५ र १७ का वडाध्यक्ष ज्यूहरु, समाजसेवी डी.बी चौधरी, फन्सराम महतो लगायतलाई चुनिएको छ। अब उपयुक्त समयमा समीतिले होटल स्तरीकरणलाई बढाउने छ।

कार्यक्रमबाट खाद्य स्वच्छता र गुणस्तर कायम गर्ने सवालमा आफूहरुले धेरै कुरा सिक्न पाएको, स्तरीकरणका ५० वटा सूचकाङ्क होटललाई मात्र होइन प्रत्येक नेपालीको किचनलाई आवश्यक पर्ने रहेछ, यसलाई त अभियानको रूपमा अघि बढाउनु पर्ने रहेछ र पालिकास्तरमै फुड सेफ्टी कर्मचारी आवश्यक रहेछ भन्ने धारणा वडाध्यक्ष चुडामणी थनेतको रहेको थियो।

रिसोर्टहरुको स्तरीकरण अभियान सफल भए यस क्षेत्रमा खाद्य स्वच्छ र गुणस्तरको हिसाबले उपयुक्त छ भन्ने सन्देश राष्ट्रिय, अन्तर्राष्ट्रिय रूपमा जाने र रिकमेण्डेड र रिपीटेड गेष्ट आउने र ल्याउने लक्ष्यलाई सहयोग पुग्ने भनाइ पर्यटनकर्मी डि.बी चौधरीको रहेको थियो। कार्यक्रमका सहभागिहरूले आज सिकेका विषयवस्तुहरुलाई आफ्नो व्यवसायमा लागू गराउने प्रतिवद्धता व्यक्त गर्नुभयो।