ई-पासपोर्टको लागि निवेदन कसरी दिने ?

काठमाडौँ:  ई-पासपोर्टको लागि अनिवार्यरुपमा अनलाइनबाट मिति र समय बुक गर्नुपर्दछ । छिटो बुकिङ्ग गर्नेको पालो पहिले आउँछ । विद्युतीय राहदानीको लागि अनिवार्यरुपमा फाराम भरी अनलाइनबाट मिति र समय बुक गर्नु पर्दछ ।

बुकिङ्ग गरेको मिति र समय भन्दा अगाडि आएर सीधै लाइन बसेको आधारमा सेवा उपलब्ध नहुने राहदानी बिभागले जनाएको छ।

आफ्नो बुकिङ्गको दिन तोकिएको समयमा मात्र आउनु पर्छ।

जस्तै, कसैले १० बजे र कसैले ११ बजेको समय लिएको भए पहिले १० बजेको समय लिएका सेवाग्राहीहरूको काम सकेपछि मात्र ११ बजेको समय बुकिङ्ग भएका सेवाग्राहीहरूलाई सेवा प्रदान हुनेछ ।

हरेक घण्टा घण्टाको बुकिङ्ग हुने, एक घण्टामा करिब दुई सय जना सेवाग्राही हुने र हाल विभागमा २२ वटा लाइभ इनरोलमेन्ट अर्थात तस्विर खिच्ने ठाउं भएकोले धेरै लाइन बस्नै आवश्यक छैन । अहिले यो ब्यवस्था कडाइका साथ लागू गरिएकोले तोकिएको मिति र समयमा मात्र आउन बिभागले अनुरोध गरेको छ।

सोही दिनको बुकिङ्ग भएका सेवाग्राहीहरूलाई पहिलो प्राथमिकता दिई विभागले प्रतिदिन राहदानी जारी गर्न सक्ने क्षमताको आधारमा स्वास्थ्य उपचार जस्ता अत्यावश्यक काम र प्रमाणको आधारमा मात्र अत्यन्त सीमित सेवाग्राहीहरूलाई सेवा उपलब्ध गराउन सक्नेछ ।

नेपालमा फाराम बुझाउनेहरुको हकमा ठाउँ छनौट गर्दा राहदानी विभाग (DOP) वा जिल्ला वा तोकिएका इलाका प्रशासन छान्न सकिने र जिल्ला वा इलाका प्रशासन कार्यालयमा निवेदन दिंदा आफूले नागरिकता लिएको वा बसाइसराइ गरेको जिल्लामा मात्र निवेदन दिन सकिने छ।

पुरानो मेशिन रिडेबल राहदानी हुनेहरुले नबीकरण (Renewal) र पहिलो पटक राहदानी बनाउने वा हस्तलिखित हुनेहरुले नयाँ (New) भन्ने Option छानेर फाराम भर्नसक्नुहुनेछ।