“विश्व खाद्य स्वच्छता दिवस”को अवसरमा खाद्य डिभिजन तनहुँद्धारा बजार अनुगमलाई तिब्रता

३८२ पटक पढिएको

अनिता गैरे– विश्व खाद्य स्वच्छता दिवसको अवसरमा खाद्य प्रविधि तथा गुण नियन्त्रण डिभिजन कार्यालय तनहुँले बिभिन्न कार्यक्रम गरि मनाउने भएको छ।

आज पहिलो दिन कार्यालय परिसरको सरसफाई, स्थानिय पालिकामा जनचेतनामूलक फ्लेक्स टाँस, मेला महोत्सवको अनुगमन निरीक्षण, म्याद नाघेका अन्दाजी ८००० रुपैँया बढीका खान अयोग्य फ्लेवरहरु तथा पटक पटक तारिएको करिब दुई लिटर तेल नष्ट गरि सम्पन्न गरेको कार्यालय प्रमुख खाद्य अनुसन्धान अधिकृत ज्योती आचार्यले नवलपुर अनलाईनलाई बताउनुभयो।

सप्ताहव्यापी कार्यक्रम अन्तर्गत आज १८ गते कार्यालय सरसफाई तथा आँबुखैरेनी नगरपालिकामा र म्याग्दे गाउँपालिकामा फ्लेक्स टाँस गर्ने तथा अनुगमन कार्य सम्पन्न भएको छ। भोलि देखि २४ गतेसम्म बिभिन्न कार्यक्रम हरु तय भएको आचार्यले जानकारी दिनुभयो।

भोलि १९ गते गोरखाको मनकामनामा बजार अनुगमन लगायत तालिम कार्यक्रमको आयोजना गरिएको छ। जेठ २० गते विद्यालयहरुमा सचेतना कार्यक्रमको आयोजना तथा २१ गते राजमार्ग छेउछाउका होटलहरुमा अनुगमन तथा तनहुँका बिभिन्न सरोकारवाला निकायहरुसँग अन्तक्रिया कार्यक्रम राखिएको छ।

जेठ २२ गते उद्योग अन्तर्गत बजार अनुगमन र नवलपुरको गैंडाकोटमा होटल व्यावसायीहरूलाई तालिम दिने कार्यक्रम रहेको आचार्यले बताउनुभयो। २३ गते शुक्रबार गैंडाकोटमा बजार अनुगमन तथा लमजुङ्गमा अन्तरक्रिया कार्यक्रम तय भएको छ भने सप्ताहव्यापी कार्यक्रमको अन्तिम दिन २४ गते देवचुली नगरपालिका र पोखरामा कार्यक्रममा सहभागी हुने कार्यक्रम रहेको आचार्यले जानकारी दिनुभयो।

विश्व खाद्य स्वच्छता दिवसको अवसरमा खाद्य प्रविधि तथा गुण नियन्त्रण विभाग र मातहतका ४२ वटै कार्यालयले सप्ताह व्यापी कार्यक्रम गरेर मनाइरहेको सन्दर्भमा खाद्य डिभिजन दमौलीले पनि सातै दिन विभिन्न कार्यक्रमहरु तथा सघन रूपमा उद्योग बजार अनुगमन गरेर मनाउने भएको कार्यालय प्रमुख खाद्य अनुसन्धान अधिकृत ज्योती आचार्यले नवलपुर अनलाईनसँगको कुराकानीमा बताउनुभयो।