नवलपुरमा स्थानीय तह निर्वाचनका लागि १५०० कर्मचारी, ९०० स्वयंसेवक परिचालन गरिने

नवलपुर अनलाइन, गैँडाकोट । आगामी वैशाख ३० गते हुने स्थानीय तह निर्वाचनका लागि नवलपुरमा सुरक्षाकर्मी बाहेक एक हजार ५०० कर्मचारी र ९०० स्वयंसेवक परिचालन गरिने भएको छ।

जिल्लाका ८ वटै पालिकामा कर्मचारी परिचालनका लागि अहिले कर्मचारीको विवरण सङ्कलनको काम भइरहेको जिल्ला निर्वाचन अधिकारी लाल प्रसाद शर्माले नवलपुर अनलाइनलाई जानकारी दिनुभयो । कार्यालयले निर्वाचनका लागि आवश्यक जनशक्ति व्यवस्थापनका लागि कर्मचारी र शिक्षकको विवरण माग गरेको छ ।

निर्वाचनमा परिचालनका लागि जिल्लास्थित कर्मचारी र शिक्षकको विवरण माग गरिएको र विवरण प्राप्त भएपछि निर्वाचन आयोगमा पठाइने उहाँले बताउनुभयो । “आयोगबाट नामावली स्वीकृत भएर आएपछि कर्मचारी खटनपटनको काम सुरू हुन्छ”,।

८ वटा स्थानीय तह रहेको नवलपुरमा  ११३ मतदान स्थल र २९९ मतदान केन्द्र रहने छन्। एक हजार मतदाता बराबर एउटा मतदान केन्द्र कायम गरिएको छ।

जिल्लामा २१ दलले भाग लिने भएका छन् । राष्ट्रिय मान्यताप्राप्त ५ र अन्य क्रियाशील १६ गरी कूल २१ दलले निर्वाचनमा भाग लिने जिल्ला निर्वाचन कार्यालय नवलपुरले जनाएको छ । दल दर्ताका लागि दिइएको समयभित्र २१ दलले दर्ता गराएको निर्वाचन अधिकारी शर्माले बताउनुभयो। निर्वाचन आयोगले अन्तिम मतदाता नामावली आज प्रकाशन गर्दैछ।

सम्बन्धित समाचार: 

• अन्तिम मतदाता नामावली प्रकाशन आज
• स्थानीय तहको निर्वाचनमा सबै जिल्लामा फरक-फरक मतपत्र