भायनेटबाट ठगिँदै ग्राहक, २०० एमबीपिएसको ईन्टरनेटमा ९० एमबीपिएस स्पीड

६३१ पटक पढिएको

गैँडाकोट– सस्तो मूल्यमा द्रुत गतिको इन्टरनेट प्रदान गर्ने भन्दै ठूला बिज्ञापन र हल्ला फैलाएको भायनेट इन्टरनेटले ग्राहकलाई ठगी गर्दै आएको छ।

पछिल्लो समय सुलभ र अनवरत सेवा दिने भन्दै आकर्षक अफर तथा योजनासहित व्यापार अगाडि बढाएको भायनेटले बिज्ञापनमा उपलब्ध गराउने भनिएको इन्टरनेट स्पीड र ग्राहकले प्राप्त गर्ने इन्टरनेट स्पीडमा ठगी गरेको पाईएको हो।

आकर्षक योजना देखाएर ग्राहक बनाउने र ग्राहक बनिसकेपछि सम्पर्क गर्दा वास्ता नगर्ने, फोन नउठाउने, गुनासो राख्दा राख्दै फोन काटिदिने, एकले अर्कालाई जिम्मेवारी देखाउने, समस्या समाधान नगरि पन्छिने गरेको गैँडाकोटका ग्राहकहरूले गुनासो गरेका छन्।

 

२०० एमबीपिएस गतिको ईन्टरनेटमा ९० एमबीपिएस!

२०० एमबीपिएस गतिको ईन्टरनेटको लागि पैसा भुक्तानी गरेको भएपनि स्पीड जाँच गर्दा ९० देखि ९४ एमबीपिएस भन्दा बढि स्पीड कहिल्यै नहुने सन्दिप भण्डारी बताउँछन्।

तारमा नोक्शानी नभए, अप्टिकल पावर राम्रो भएको खण्डमा १७० देखि १८० एमबीपिएस भन्दा बढिको इन्टरनेट स्पीड तपाईँले पाउनुपर्छ चितवन कार्यालयमा कार्यरत एक कर्मचारीले फोन सम्पर्कमा बताए। पटक पटक मुख्य कार्यालयमा सम्पर्क गर्दा यस बारेमा फिल्ड टिमलाई जानकारी गराउने भन्दै जिम्मेवारीबाट पन्छिने र समस्या समाधान नगरेको भण्डारीको गुनासो छ।

 

गुनासो दर्ता र सपोर्ट टीमका लागि केन्द्रकै भर!

सेवाग्राहीलाई २४ घण्टा सेवा दिने भने पनि हप्तौँसम्म वास्ता नगर्ने लामो समय तपाईँको गुनासो टिपाएका छौँ भन्दै समस्या बाट आफु उम्किने कल सेन्टरका प्रतिनिधिको व्यवहार सदैव उस्तै छ।देशभरका ग्राहकले केन्द्रमै फोन गरेर पालो पर्खिनु पर्ने र दिनभर फोन गर्दा समेत फोन नउठ्ने गरेको पीडितहरूको गुनासो छ।

“सेवाग्राहीले इन्टरनेटमा समस्या आउँदा पटकपटक केन्द्रमै फोन गर्नुपर्छ।सेवा प्रदायकले वास्ता गर्दैन, पैसा तिरेर पनि सेवा नपाउने, जिल्ला देखि फिल्ड टिमको सम्पर्क नम्बर नहुने, केन्द्रकै भर पर्नुपर्ने भएकोले भायनेट चलाउनुको अर्थ छैन् गैँडाकोटका अर्का सेवाग्राहीले गुनासो गरे।

 

२४ घण्टा बितिसक्दा मर्मत हुँदैन इन्टरनेट

असार २२ गते साँझ ६ बजेको समयमा चल्दै गरेको इन्टरनेट अचानक बन्द भयो। भायनेटको केन्द्रिय कार्यालयको ल्यान्डलाइन साँझ नउठ्ने हुँदा टोलफ्रिमा इन्टरनेट नचलेको गुनासो टिपाएँ। फाइबर केबल ब्रिकेज भएको, पोलमा पहिलो स्पिल्टर बिग्रिएको तथा पुल्चोकमा पोलमा आगलागि भएको भन्दै भोलि १० बजे फिल्ड टिमलाई पठाईदिने भन्दै कल सेन्टरका एक व्यक्तिले गुनासो दर्ता गरे। आज बिहानै देखि केन्द्रमा फोन गरेर छिट्टै इन्टरनेट मर्मतका लागि बारम्बार आग्रह गरिरहेँ। १ बजेको समयतिर एउटा फोन आयो। घरको लोकेसन मागे अनुसार लोकेसन बताएँ। १० मिनेटमै आएर इन्टरनेट मर्मत गर्छौँ भन्दै उनले फोन राखे। करिब १ घण्टा पश्चात फेरि फोन गरेँ। उनले घरमा आई इन्टरनेट बनाएर फर्किसकेको बताए। घरमा सम्पर्क गरेर सोध्दा इन्टरनेट बनाउनै नआएको हुँदा उनी झुट बोलेको साबित भयो। उनलाई बारम्बार फोन गरेर आग्रह गरिरहेँ उनले भरतपुर फर्किसकेको र अर्को टीम भएको खण्डमा भनिदिउँला भन्दै फोन राखे। केही बेरमा म फेरि फोन गरेर यताको टिमको सम्पर्क नम्बर दिनु भने पश्चात उनले अर्को टीमको नम्बर म्यासेज गरे। अर्को टिमका एकजनाले पुल्चोकमा रहेको र यता काम सकिन लागेकोले केहीबेरमै आउने आश्वासन दिए। कुर्दा कुर्दै बेलुकाको ७ बज्यो। इन्टरनेटमा समस्या आएकै २४ घण्टा बितिसक्दा गुनासो सम्बोधन नभएपछि भायनेटप्रति विश्वास लाग्न छोडेको (नाम नखुलाउने शर्तमा) पीडितले बताए। भायनेटकै कारणले इन्टरनेटमा समस्या आएर केहि दिन इन्टरनेट बन्द भएपनि त्यस बारेमा समयमा मोबाईलमा इन्टरनेट अवरोधबारे म्यासेज आउँदैन्।इन्टरनेट नचलेको बारे ग्राहकले गुनासो गरेपश्चात मात्रै म्यासेज पठाउँछन् पीडितले भने। कम्पनीकै कारणले चौबिस घण्टा भन्दा बढि इन्टरनेट काटिँदा समेत काटिएको दिनको थप इन्टरनेट उपलब्ध नगराएको पीडितको गुनासो छ।

बजारमा इन्टरनेट कम्पनीहरूको प्रतिस्प्रर्धा छ। बिभिन्न अफरहरूको नाममा कम स्पीडको इन्टरनेट प्रदान गरेर कम्पनीहरूले सिधै ग्राहकहरू ठग्ने गरेका छन्। यता भने ग्राहकले मोवाइल तथा ल्यापटपमा सामाजिक सञ्जाल र अन्य दैनिक कार्यहरू सामान्य इन्टरनेटबाटै चल्ने भएकोले स्पीड जाँच गर्ने नगरेको उनीहरूको भनाई छ। यसमा निमायक निकायले अनुगमन गर्दै कानुनी कारवाहीको दायरामा ल्याउन भने जरूरी देखिन्छ।