गैँडाकोटमा जारी प्रदेशस्तरीय महोत्सवमा दर्शकको भीड, भोलि प्रिती आलेको प्रस्तुती रहने

गैँडाकोटमा सुरु भएको प्रथम गण्डकी प्रदेशस्तरीय औद्योगिक व्यापार मेलाको साङ्गीतिक कार्यक्रममा दर्शकहरुले भरतपुर मनोरञ्जन लिएका छन् ।

आज फागु पूर्णिमा अर्थात होलीसमेत परेका कारण महोत्सवस्थल होलिमय बनेको थियो । होली विशेष सांस्कृतिक कार्यक्रममा लोक तथा दोहोरी गायिका राधिका हमाल, गायक रमेशराज भट्टराई, एमटी महतलगायतका कलाकारहरुले गीत दर्शकलाई नचाएका थिए । गायक भट्टराईले गीत गाउँदै सांस्कृतिक कार्यक्रमको सुरुआत गरेका थिए । भट्टराईले गाउन थालेपछि उनलाई दर्शकले साथ दिए ।

महोत्सवको सांस्कृतिक कार्यक्रममा गायक भट्टराईले आफ्ना चर्चित एक दर्जन बढी गीतहरु गाउँदै दर्शकलाई छमछमी नचाउन सफल भएका थिए । त्यस्तै, गायिका हमाललाई पनि दर्शकहरुले साथ दिए । उनले आफ्न नया तथा पुराना चर्चित गीतहरु गाएकी थिइन् । सांस्कृति कार्यक्रम अन्तर्गत आज साँझ नै प्रत्यक्ष दोहोरी गीत गाउँदै कलाकारहरुले दर्शकलाई भरपुर मनोरञ्जन दिएका थिए ।

फागुन २१ गतेदेखि गैँडाकोट–२ स्थित नारायणी नदी किनारमा सुरु भएको प्रथम गण्डकी प्रदेशस्तरीय औद्योगिक व्यापार मेलामा भोलि मंगलबार चर्चित गायिका प्रिती आलेले गीत गाउने भएकी छिन् । होलि धमाका नाम दिइएको सांस्कृतिक कार्यक्रममा प्रिती आलेसहितका कलाकारहरुको प्रस्तुती रहने मेलाको सांस्कृतिक संयोजक किशोर लम्सालले जानकारी दिए । मंगलबारको होलि धमाका कार्यक्रममा प्रितीसँगै दुर्गेन डोङ, प्रतिमा गैरेलगायत स्थानीय कलाकारहरुको प्रस्तुती रहने लम्सालको भनाइ छ ।

महोत्सवको दोस्रो दिन सोमबार दर्शकहरुको उल्लेख्य उपस्थिति रहेको नेपाल उद्योग वाणिज्य महासंघ गण्डकी प्रदेश सदस्य लिलाबहादुर अधिकारीले जानकारी दिए । भोलि मंगलबार तराई होलि परेकाले दर्शकहरुको संख्या अझै उल्लेख्यरुपमा बढ्नेसमेत अधिकारीको भनाइ छ । महोत्सव आइतबारबाट मात्रै सुरु भएकाले दर्शकहरुको उपस्थिति विस्तारै बाक्लिदै जाने अधिकारीले बताए ।