राजु परियार, पूर्णकला बिसी र सूर्य खड्कासँगै झुमे दर्शकहरू

नवलपुरको गैँडाकोटमा जारी ‘प्रथम गण्डकी प्रदेशस्तरीय औद्योगिक व्यापार मेला–२०७९’ को हालसम्म २२ हजार दर्शकले अवलोकन गरेका छन् । मेला सञ्चालन भएको चौथो दिनसम्म आइपुग्दा २२ हजार दर्शकले मेलाको अवलोकन गरेका मेला सहसंयोजक एवं जिल्ला उद्योग वाणिज्य संघ गैँडाकोटका अध्यक्ष अमृत भट्टचनले जानकारी दिए ।

भट्टचनका अनुसार मेलाको चौथो दिन बुधबारमात्रै करिब पाँच हजार दर्शकले मेलाको अवलोकन गरेका छन् । मेलामा दर्शकहरुको उपस्थिति अपेक्षाकृत नै रहेको भट्टचनले जानकारी दिए । मेलाका अवसरमा बुधबार मेलास्थलमा खुल्ला रक्तदान कार्यक्रमसमेत सम्पन्न गरिएको छ।

गैँडाकोट–२ युवा क्लबद्वारा आयोजित रक्तदान कार्यक्रमा ३६ जनाले रक्तदान गरेका मेलाका सहसंयोजक भट्टचनले जानकारी दिए । सामाजिक उत्तरदायित्व अन्तर्गत विभिन्न संघसंस्थासँगको सहकार्यमा बुधबार खुल्ला रक्तदान कार्यक्रमको आयोजना गरिएको भट्टचनको भनाइ छ ।

मेलामा हस्तकला, कृषि, पुष्प, अटो, सूचना र प्रविधि प्रदर्शनी तथा दैनिक उपभोग्य वस्तुहरुको घरायसी सामान, लत्ताकपडा, श्रृङ्गारका सामग्रीसहितका ३०० स्टल रहेको उनले जानकारी दिए । तर अधिकांश स्टलहरूमा सामान किन्नेहरू कत्तिपनि नभएको र सुनसान गैँडाकोट महोत्सव भन्दै केही स्टल राखेका व्यापारीहरूले गुनासो गरे।  १५ भन्दा बढि स्टलहरू खाली छन् भने भएका स्टलहरूमा पनि सोचेजस्तो व्यापार नहुँदा व्यापारीहरू चिन्तित देखिन्थे।

बुधबारको सांस्कृतिक कार्यक्रममा चर्चित लोक तथा दोहोरी गायक राजु परियार, पूर्णकला बिसी, सूर्य खड्का र वसन्त लम्साललगायतका कलाकारहरुको प्रस्तुती रहेको मेलाका सांस्कृतिक कार्यक्रम संयोजक किशोर लम्सालले जानकारी दिए । लम्सालका अनुसार राष्ट्रिय कलाकारसहित स्थानीय कलाकारहरुले समेत आफ्नो प्रस्तुती राखेका थिए । पूर्णकला र राजु परियारले मेलाको सांस्कृतिक कार्यक्रममा प्रस्तुती राख्ने भएपछि मेलास्थलमा साँझपख दर्शकहरुको बाक्लो उपस्थिति रहेको थियो ।