जयश्री फुड्सको रक्तदान कार्यक्रममा ११८ जनाद्धारा रक्तदान

११४ पटक पढिएको

गैंडाकोट- जयश्री फुड्स प्रा.लि ले आज वैशाख २० गते शनिबार बृहत रक्तदान कार्यक्रम सम्पन्न गरेको छ।

शनिवार बिहान ७ बजे देखि जयश्री फुड्सको प्राङ्गगणमा सुरू भएको रक्तदान कार्यक्रमको औपचारिक उद्घाटन नगर प्रमुख मदन भक्त अधिकारीले गर्नुभएको थियो।

उद्योग स्थापना भएको १३ औँ वर्ष प्रवेशको अवसर पारेर रक्तदान कार्यक्रमको आयोजना गरेको जयश्री फुड्सका व्यवस्थापक अमित अग्रवालले बताउनुभयो। रक्तदान कार्यक्रममा ११८ जनाले रक्तदान गरेका छन। जसमा पुरूष १०६ जना र महिला १२ जना रहेका छन्। ३२ जनाले पहिलोपटक जयश्री फुड्स प्रा.लि ले आयोजना गरेको रक्तदान कार्यक्रम मार्फत रक्तदान गरेका छन्।

जयश्री फुड्सले यसअघि पनि नेपाल रेडक्रस सोसाईटी सँगको सहकार्यमा नियमित रक्तदान कार्यक्रम गर्दै आएको छ । रक्तदान कार्यक्रममा नेपाल रेडक्रस सोसाईटी, ब्लड बैंक, गैँडाकोट ९ स्थित नवजागरण ग्रामिण विकास केन्द्रको सहयोगमा रक्तदान कार्यक्रम सम्पन्न गरेको छ।

गत बर्ष बैशाख २९ गते १२ औँ बर्ष प्रबेशको अवसरमा जयश्रीले गरेको रक्तदान कार्यक्रममा १२७ जनाले रक्तदान गरेका थिए। यस रक्तदान कार्यक्रमलाई सफल बनाईदिनुहुने सबै रक्तदाता र सहयोगी दिदी बहिनी दाजुभाईहरुलाई ह्रदयदेखि धन्यवाद दिन चाहन्छु अग्रवालले भन्नुभयो।