एमाले महाधिवेशन प्रतिनिधि देशभर एकसाथ आज चयन गरिँदै

२५ पटक पढिएको

काठमाडौं । नेकपा एमालेको ११औं राष्ट्रिय महाधिवेशनको लागि आज एकैदिन देशभर प्रतिनिधि छनौट चयन हुँदैछ । मंसिर २७-२९ गतेमा काठमाडौंमा हुने पार्टीको महाधिवेशनका लागि आज प्रतिनिधिहरू छनोट गर्न लागिएको हो ।

कतिपय जिल्ला, जनसंगठन, निर्वाचन क्षेत्र एवम् स्वदेशका प्रदेशस्तरीय (विशेषसमेत) कमिटीमा शुक्रबार नै सर्वसम्मत रुपमा प्रतिनिधि चयन भइसकेका छन् । आज सर्वसम्मत नभएको स्थानमा निर्वाचन गरेर प्रतिनिधि चयन गर्ने तयारी गरिएको छ । एमालेले मंसिर १५ गतेभित्र महाधिवेशन प्रतिनिधिको सबै विवरण पठाउन निर्देशन दिइएको बताए ।
एमालेको संगठन विभागले प्रतिनिधिको उम्मेदवारी शुल्क एक हजारभन्दा बढी नलिन निर्देशन दिएको छ ।

एमालेको महाधिवेशनमा झण्डै २२ सय प्रतिनिधि सहभागी हुँदैछन् । एमालेका संगठित सदस्य ६ लाख ६७ हजार ६३० रहेका छन् । एमालेले पार्टी सदस्यको संख्याअनुसार ‘क्लस्टर’ छुट्याएर प्रतिनिधि चयनको मापदण्ड बनाइएको छ ।

महाधिवेशनमा प्रतिनिधित्व गर्ने सबैभन्दा ठूलो क्लस्टर भनेको भूगोल हो । भुगोललाई एमालेले संघीय निर्वाचन क्षेत्रका आधारमा विभाजन गरेको छ । एमालेले पठाएको अपानिमा केन्द्रीय कमिटी, तीनवटा आयोग र केन्द्रीय सल्लाहकार परिषद्‌बाट निर्वाचितसहितका प्रतिनिधि रहनेछन् । त्यसगरी विशेष जिल्ला, प्रदेश र जनसंगठनबाट पनि प्रतिनिधि कायम हुन्छन् । एमालेले प्रत्येक निर्वाचन क्षेत्रबाट १ जना युवा अनिवार्य गरेको छ ।

 

एमालको प्रतिनिधि छनोट विधि:

संघीय निर्वाचन क्षेत्रबाट खुला, महिला, दलित तथा युवाहरु सहित करिब २ हजार प्रतिनिधि छनौट हुँदैछन् ।  यस्तै प्रवास, जनसंगठन र विभागहरुबाट करिब १ सय प्रतिनिधि छनौट हुनेछन् ।  एमालेको कात्तिक १५ गते बसेको केन्द्रीय सचिवालय बैठकले गरेको निर्णय अनुसार प्रतिनिधिसभा निर्वाचन क्षेत्रलाई आधार मानेर प्रति १२ सयबाट सदस्य खुला दुई र महिला एक निर्वाचित गर्नुपर्नेछ । यसरी प्रतिनिधि छान्दा एक जना ४० वर्ष भन्दा कम उमेरका युवा अनिवार्य हुनुपर्ने छ । त्यस्तै प्रति ८ सय सदस्यबाट एक प्रतिनिधि, जसमा महिला निर्वाचित गर्ने विधि तय गरिएको छ ।

त्यसैगरी दलितका लागि प्रति पाँच सय सदस्यबाट एक प्रतिनिधि निर्वाचित गर्नुपर्ने विधि राखिएको छ भने ट्रेड युनियनमा प्रदेशबाट सात जना प्रतिनिधि रहनेछन् । त्यसैगरी जनसंगठनबाट प्रतिजनसंगठन ५ जनाको प्रतिनिधित्व रहनेछ भने महासङ्घीय ढाँचामा रहेका जनसंगठनबाट भने सात जनाको प्रतिनिधित्व रहनेछ । त्यस्तै विभाग र कार्यालयबाट एक-एक जनाको प्रतिनिधित्व रहनेछ । प्रवासबाट महादेश अनुसार पाँच जनाको प्रतिनिधित्व रहनेछ ।

त्यसैगरी केन्द्रीय कमिटीबाट ३५४ जना स्वतः प्रतिनिधि हुनेछन् । त्यस्तै अनुशासन आयोगबाट २९, लेखा आयोगबाट ३०, निर्वाचन आयोगबाट २५, सल्लाहकार परिषद् बाट २५ जना प्रतिनिधि रहनेछन् । यी कमिटीबाट जम्मा ४६४ जना स्वतः प्रतिनिधि हुनेछन् ।

एमालेको कुल संगठित सदस्य संख्या ६ लाख ६७ हजार ६३० सदस्य मध्ये प्रदेशबाट ४५, प्रतिनिधि सभाको निर्वाचन क्षेत्रबाट करिब ९७०, विशेष जिल्लाबाट ४७, दलितबाट ८१, ट्रेड युनियनबाट ४९, यस्तै  प्रवासबाट, केन्द्रीय विभाग र कार्यालयबाट, जनसंगठनबाट सहित गरी अनुमानित १९ सयभन्दा बढी प्रतिनिधि रहनेछन् । पाँच प्रतिशत प्रतिनिधि केन्द्रीय कमिटीले मनोनयन गर्नेछ । यी सबै जोड्दा कुल २१ सय भन्दा बढी प्रतिनिधि रहने अनुमान गरिएको छ ।