कृषि विकास बैंकको सञ्चालक समिति अध्यक्षमा पाण्डेय नियुक्त

४३ पटक पढिएको

काठमाडौँ । कृषि विकास बैंक लिमिटेडको सञ्चालक समितिको अध्यक्षमा टंकप्रसाद पाण्डेय नियुक्त भएका छन् ।

बैंकको सञ्चालक समितिको निर्णयअनुसार पाण्डेयलाई अध्यक्ष पदमा नियुक्त गरिएको हो । नवनियुक्त अध्यक्ष पाण्डेयले निजामती सेवामा करिब २५ वर्ष कार्य गर्दै महत्वपूर्ण अनुभव हासिल गरेका छन् । उनीसँग आर्थिक क्षेत्रसहित विभिन्न सरकारी तथा संस्थागत निकायमा काम गरेको अनुभव रहेको जनाइएको छ ।

बैंक तथा वित्तीय संस्था सम्बन्धी ऐनअनुसार बैंकका नवनियुक्त अध्यक्षले नेपाल राष्ट्र बैंकका गभर्नरसामु सपथ ग्रहण गर्नुपर्ने व्यवस्था छ । सोही प्रावधानअनुसार पाण्डेयले नेपाल राष्ट्र बैंकको केन्द्रीय कार्यालय बालुवाटारमा आयोजित कार्यक्रममा गभर्नर विश्वनाथ पौडेल समक्ष पद तथा गोपनीयताको सपथ ग्रहण गरेका हुन् ।

सपथ ग्रहण कार्यक्रममा नेपाल राष्ट्र बैंकका डेपुटी गभर्नर किरण पण्डित, कार्यकारी निर्देशकहरू रामु पौडेल, गरु प्रसाद पौडेल, दीर्घबहादुर रावल तथा मुक्तिनाथ सापकोटा, निर्देशक मीरा ताल्चाभडेल, बोर्ड सचिव शरणकुमार अधिकारी, कृषि विकास बैंकका प्रमुख कार्यकारी अधिकृत गोविन्द गुरुङ तथा कम्पनी सचिव एवं प्रवक्ता हिमलाल पौडेललगायतको उपस्थिति रहेको थियो ।

नवनियुक्त अध्यक्ष पाण्डेयले बैंकको संस्थागत सुदृढीकरण, कृषि क्षेत्रको वित्तीय पहुँच विस्तार तथा सेवाको गुणस्तर अभिवृद्धिका लागि काम गर्ने अपेक्षा गरिएको बैंकले जनाएको छ ।