खोलामा नुहाउन गएकी वृद्ध मृत फेला

३० पटक पढिएको

कपिलवस्तु, असार ४ गते ।कपिलवस्तुको बुद्धभूमि नगरपालिका–९ स्थित गुडरुङ खोलामा नुहाउन जानुभएकी  ८० वर्षीय वृद्ध मृत अवस्थामा फेला पर्नुभएको छ ।

मृत्यु हुनेमा बुद्धभूमि नगरपालिका–४ भगिरामपुर निवासी रुपासेन वली रहेको जिल्ला प्रहरी कार्यालय कपिलवस्तुका सूचना अधिकारी प्रहरी नायब उपरीक्षक रिपेन्द्र कुमार सिंहले जानकारी दिनुभयो ।

बिहीबार बिहान स्थानीयवासी बाट सूचना प्राप्त भएपछि इलाका प्रहरी कार्यालय गोरुसिङ्गेबाट प्रहरी निरीक्षक बाबुराम बस्नेतको नेतृत्वमा प्रहरी टोली घटनास्थल पुगेको थियो ।

घटनास्थलमा मृतकको कपडा र झोला पुलको छेउमा रहेको फलामको पोलमा राखिएको अवस्थामा फेला परेको प्रहरीले जनाएको छ ।

प्रहरीका अनुसार रुपासेन वली केही समयदेखि आफ्नी छोरी जमुना केसीको घरमा बस्दै आएकी थिइन् । घटनाको दिन बिहान कसैलाई जानकारी नदिई घरबाट निस्किएको प्रारम्भिक अनुसन्धानबाट खुलेको छ ।घटनाबारे थप अनुसन्धान भइरहेको प्रहरीले जनाएको छ ।गोरखापत्र