गुल्मीमा बुवाको बन्चरो प्रहारबाट छोरा गम्भीर घाइते

५४ पटक पढिएको

गुल्मीको इस्मा गाउँपालिका–२ खजुरेका ४८ वर्षीय नरबहादुर कुमाल ६८ वर्षीय बुबा टमबहादुर कुमालको बन्चरो प्रहारबाट गम्भीर घाइते भएका छन्।

जिल्ला प्रहरी कार्यालय गुल्मीका सूचना अधिकारी प्रहरी नायब उपरीक्षक (डीएसपी) वीरेन्द्रवीर विश्वकर्माका अनुसार मादक पदार्थ सेवन गरेका टमबहादुरले घरायसी विवादका क्रममा धारिलो हतियार (बन्चरो) प्रहार गरेका हुन्।

बन्चरो प्रहारबाट नरबहादुरको बायाँ कानमा गम्भीर चोट लागेको प्रहरीले जनाएको छ। उहाँको गुल्मी अस्पताल, तम्घासमा प्रारम्भिक उपचारपछि थप उपचारका लागि लुम्बिनी प्रादेशिक अस्पताल, बुटवल रिफर गरिएको डीएसपी विश्वकर्माले बताउनुभयो।

घटनापछि फरार रहनुभएका टमबहादुरलाई प्रहरीले नियन्त्रणमा लिएको छ। घटनाबारे थप अनुसन्धान भइरहेको जिल्ला प्रहरी कार्यालय गुल्मीले जनाएको छ।गोरखापत्रबाट