आज विश्व प्राथमिक उपचार दिवस मनाइदै

८ पटक पढिएको

काठमाडौँ । हरेक वर्ष सेप्टेम्बरको दोस्रो शनिबार विश्व प्राथमिक उपचार दिवस मनाइन्छ । यस वर्ष यो दिवस आज सेप्टेम्बर १२ मा मनाइँदैछ । आपत्कालीन अवस्थामा प्राथमिक उपचारको महत्वबारे जनचेतना फैलाउने उद्देश्यले यो दिवस मनाउने गरिएको हो ।

प्राथमिक उपचार सामान्य उपकरण र आधारभूत ज्ञानको प्रयोगबाट जोकोहीले गर्न सक्ने तत्कालीन सहयोग हो । यसले घाइते वा बिरामीको जीवन जोगाउन, अवस्था थप बिग्रन नदिन, स्वास्थ्यमा सुधार ल्याउन र स्वास्थ्य संस्थासम्म सुरक्षित रूपमा पुर्‍याउन महत्वपूर्ण भूमिका खेल्छ ।

यस वर्षको विश्व प्राथमिक उपचार दिवसको मुख्य विषय ‘प्रवासको अवस्थामा प्राथमिक उपचार’ रहेको छ । यसले आप्रवासी तथा विस्थापित मानिसलाई यात्राका क्रममा आवश्यक प्राथमिक उपचार र आपत्कालीन सहयोग सहज रूपमा उपलब्ध गराउनुपर्नेमा जोड दिएको छ ।

अचानक दुर्घटना वा स्वास्थ्य समस्या देखिएमा स्वास्थ्यकर्मी पुग्नुअघि वरपर रहेका व्यक्तिले दिएको प्राथमिक उपचारले जीवन जोगाउन महत्वपूर्ण भूमिका खेल्न सक्छ। त्यसैले प्राथमिक उपचारसम्बन्धी आधारभूत ज्ञान र सीप सबैमा विकास गर्नुपर्ने सन्देश यस दिवसले दिएको छ ।

विश्व प्राथमिक उपचार दिवस सन् २००० देखि हरेक वर्ष सेप्टेम्बरको दोस्रो शनिबार मनाउन थालिएको हो । आपत्कालीन अवस्थामा प्राथमिक उपचार गर्दा स्थान सुरक्षित गर्ने, घाइतेको अवस्था जाँच्ने, सहयोग माग्ने र आवश्यक प्राथमिक उपचार गर्ने चार आधारभूत चरणलाई मुख्य रूपमा अपनाउनुपर्छ  ।

प्राथमिक उपचारले मानिसको जीवन जोगाउने भएकोले सवै उमेर समूह  र पछाडि परेका सवै समुदायलाई प्राथमिक उपचार सीप लिन प्रेरित गर्न आजको दिनले सन्देश दिएको छ ।