शालिन पोखरेल मृत्यु प्रकरणलाई लिएर गैंडाकोटमा प्लेकार्ड सहित प्रदर्शन

३९५ पटक पढिएको

गैंडाकोट, फागुन २० । शालिन पोखरेल मृत्यु प्रकरणलाई लिएर आज गैंडाकोटका स्थानीयले दवाब स्वरुप प्लेकार्ड सहित प्रदर्शन गरेका छन् ।

शालिन मृत्युको घटनामाथि निष्पक्ष छानबिनको  माग गर्दै भएको प्रदर्शनमा स्थानीय सहित जनप्रतिनिधि हरुको समेत सहभागिता रहेको थियो।

गैंडाकोटको भृकुटी चोक राजमार्गमा झण्डै एककिलोमिटर लामबद्ध  प्रदर्शन सङ्गै सालिन घटनाका बिषयमा उपस्थितलाई सामाजिक अभियन्ताहरू उपस्थित थिए।

कार्यक्रमको संयोजक सामाजिक अभियन्ता शुदर्सन प्रसाद खरेलले उपस्थितलाई सम्बोधन गर्दै शालिनको मृत्युको घटनाप्रति ध्यानाकर्षण गर्न र न्यायपूर्ण समाज निर्माण गर्ने उदेश्यले प्रदर्शन गरिएको बताउदै आफ्ना छोराछोरीका बिषयमा अभिभावकनै सचेत हुनुपर्ने बताए ।

खरेलले उक्त घटनाको सत्यतथ्य सहित अनुसन्धानको माग समेत गरे । चितवनको रत्ननगर नगरपालिका–१० स्थित एकता शिशु निकेतनको होस्टेलमा शालिन पोखरेल शङ्कास्पद रूपमा मृत फेला परेकी थिइन् ।

घटना अनुसन्धानका लागि प्रहरीले स्कुलका प्रिन्सिपल, भाइस प्रिन्सिपल र होस्टलको वार्डेनलाई पक्राउ गरेर अनुसन्धान भैरहदा मृत भेटिएकी शालिन पोखरेलको बलात्कार नभएको रिपोर्ट आएको छ । त्रिवि शिक्षण अस्पतालमा गरिएको पोस्टमार्टममा बलात्कार वा यौनजन्य अपराधका कुनै संकेत नभेटिएको पोस्टमार्टम रिपोर्टमा जनाइएको छ ।