बाघसँग मोटरसाइकल ठोक्किँदा चालक घाइते

३३ पटक पढिएको

चितवन । चितवनको माडी नगरपालिका–९ रातोमाटे डाँडा क्षेत्रमा मोटरसाइकल बाघसँग ठोक्किँदा एक जना घाइते भएका छन् ।

माडीबाट ठोरीतर्फ जाँदै गरेको बागमती प्रदेश ००२ प ६८६३ नम्बरको मोटरसाइकल बाघसँग ठोक्किएको हो । दुर्घटनामा मोटरसाइकल चालक पर्साको ठोरी गाउँपालिका–१ निवासी करिब ४० वर्षीय अजित कुँवर घाइते भएका छन् ।

दुर्घटनामा कुँवरको बायाँ पाखुरा र टाउकोमा चोट लागेको प्रहरीले जनाएको छ। उनलाई स्वास्थ्य चौकी चोकबजार, ठोरीमा सामान्य उपचारपछि थप उपचारका लागि वीरगञ्ज पठाइएको छ ।

घटनाबारे थप अनुसन्धान भइरहेको प्रहरीले जनाएको छ ।