गुल्मीको छल्दी–रातडाँडा सडक पुनः सात दिन बन्द हुने

३५ पटक पढिएको

रमेश विश्वकर्मा, गुल्मी, असार २० – गुल्मीको छल्दी–रातडाँडा सडक आज (शनिबार)देखि पुनः सात दिनका लागि बन्द हुने भएको छ। सडक पूर्वाधार विकास कार्यालय गुल्मीअन्तर्गत सञ्चालित छल्दी–पनाहा–इन्द्रगौँडा सडक स्तरोन्नति आयोजनाको निर्माण कार्यका क्रममा सडक खण्डको स्याला पहिरो खण्डमा कडा चट्टान परेका कारण मेसिनबाट भइरहेको कटान कार्यले गति लिन नसकेको र ढुङ्गा खस्ने जोखिम भएको हुँदा पुनः सात दिनसम्म उक्त सडक बन्द हुने जनाएको छ।

यहि असार ३ गतेदेखि १८ गतेसम्म यो सडकमा चौबीसै घण्टा सवारी आवागमन बन्द गरिएको थियो। सडक पूर्वाधार विकास कार्यालय गुल्मीको पत्र अनुसार यात्रु तथा सवारी साधनको सुरक्षालाई मध्यनजर गर्दै प्रशासनले यस अवधिभर सो सडक खण्डबाट चल्ने सवारी साधनहरूलाई वैकल्पिक मार्ग प्रयोग गर्न आग्रह गरिएको प्रशासन कार्यालयका प्रशासकीय अधिकृत नारायण घर्तीले जानकारी दिनुभयो। उहाँका अनुसार आज र भोलि (आइतबार) दुई दिन यस सडक खण्ड पूर्ण रूपमा बन्द रहनेछ। सोमबारदेखि आंशिक रुपमा सडक बन्द रहनेछ।

यस अवधिमा बिहान ९ देखि ११ बजेसम्म र साँझ ४ देखि ६ बजेसम्म बाटो खुल्नेछ। यस समयबाहेक अन्य समयमा सडक पूर्ण रूपमा बन्द रहने बताइएको छ। सडक खण्ड भएर चल्ने सवारी साधनहरूलाई वैकल्पिक मार्गको प्रयोग गरी आवतजावत गर्न जिल्ला प्रशासन कार्यालयले आग्रह गरेको छ। वैकल्पिक सडकका रूपमा तम्घास–बाँझेछेडा–रातडाँडा सडक तथा तम्घास–अर्खले–खोरपाटा–डाँडाखर्क–रातडाँडा सडक प्रयोग गर्न गर्न सकिनेछ।