मकवानपुरको १० वटै स्थानीय तहबाट निःशुल्क ई–पासपोर्ट भर्ने व्यवस्था

जिल्ला प्रशासन कार्यालयमा ई–पासपोर्टका लागि अनलाइन फारम भर्नेको भीडभाड बढेको तथा निजीले मनलाग्दी रकम लिएर फारम भरिरहेको गुनासो आएपछि स्थानीय तहको सहयोग र समन्वयमा स्थानीय तहमा ई–पासपोर्टका लागि निःशुल्क फारम भर्ने व्यवस्था मिलाइएको मकवानपुरका प्रमुख जिल्ला अधिकारी राजेन्द्रदेव पाण्डेले जानकारी दिए ।

आज जिप्रका मकवानपुरमा पत्रकार सम्मेलन गर्दै उनले आजबाट जिल्लाको स्थानीय तहबाट निःशुल्क रुपमा ई–पासपोर्टका लागि अनलाइन फारम भर्न सकिने र राष्ट्रिय परिचयपत्र बनाउन सकिने बताए ।

उनले जिल्लामा ई –पासपोर्ट को लागि दैनिक ९० र  सातामा ५४० जनाले फारम भर्न सकिने बताउँदै समयमा स्थानीय तहमा कार्यालयमा पुगेर फारम भर्न सकिने जानकारी दिए ।

असार २१ गते जिल्लाको १० वटै स्थानीय तहमा प्रमुख र प्रमुख प्रशासकीय अधिकृतसँगको बैठकमा स्थानीय तहमा ई–पासपोर्टका लागि अनलाइन फारम भर्न सकिने र राष्ट्रिय परिचयपत्र बनाउनका लागि वातावरण मिलाइएको प्रजिअ पाण्डेले जानकारी दिए ।

पछिल्लो समय जिल्ला प्रशासन कार्यालयमा ई–पासपोर्ट र परिचयपत्र बनाउनेको भीड लागि रहेकाले सो समस्या समाधानका लागि स्थानीय तहबाट ई–पासपोर्टको फारम भर्ने व्यवस्था मिलाइएको बताइएको छ ।