नवौँ राष्ट्रिय खेलकुद: ८६ पदकसहित सेना शीर्ष स्थानमा

२८५ पटक पढिएको

कास्की, असोज ३१ गते । गण्डकी प्रदेशमा जारी नवौँ राष्ट्रिय खेलकुद प्रतियोगिताको पदक तालिकामा विभागीय टोलीको दबदबा देखिएको छ । सोमबार दिउँसोसम्म  छिनोफानो भएका खेलका पदकमा विभागीय टोली नेपाली सेना शीर्षस्थानमा छ ।

सेनाले सुरुआतदेखि नै आफ्नो अग्रता बनाएकामा पछिल्लो समय यसलाई फराकिलो बनाउँदै लगेको छ । पदक तालिकाको द्वितीय र तृतीय स्थानमा पनि विभागीय टोली अगाडि आएका छन् ।

प्रदेशले विभागीय टोलीलाई पछ्याइरहेका छन् । सोमबार दिउँसोसम्म ८७ स्वर्णपदकको छिनोफानो हुँदा सेनाले ३८ स्वर्णसहित अग्रता बनाएको हो । सेनाले २७ रजत र २१ कांस्यसहित ८६ पदक जितेको छ ।

यसैगरी विभागीय सशस्त्र प्रहरी बलको एपिएफ क्लब १२ स्वर्ण, १६ रजत र २२ कांस्यसहित ५० पदक जितेर सेनालाई पछ्याइरहेको छ । विभागीय टोली नेपाल पुलिस क्लबले ११ स्वर्ण, सात रजत र १७ कांस्यपदकसहित ३५ पदक जितेर तृतीय स्थानमा  छ ।

बागमती प्रदेश पदक तालिकाको चौथो स्थानमा छ । बागमती प्रदेशले १० स्वर्ण, १६ रजत र १० कांस्यसहित ३६ पदक जितेको छ । आयोजक गण्डकी प्रदेशले हालसम्म आठ स्वर्ण, पाँच रजत र १५ कांस्य गरी २८ पदक हात पारेको छ । गैरआवासीय नेपाल सङ्घ(एनआरएनए)ले चार स्वर्ण, तीन रजत र चार कांस्यसहित ११ पदक जितेको छ ।

यसैगरी मधेस प्रदेशले दुई स्वर्ण, दुई रजत र चार कांस्यसहित आठ पदक ल्याउँदा प्रदेश नं १ ले एक स्वर्ण, चार रजत र १३ कास्यसहित १८ पदक जितेका छन् । सुदूरपश्चिम प्रदेशले एक स्वर्ण, एक रजत र आठ कांस्यसहित १० पदक जित्दा लुम्बिनी प्रदेश र कर्णाली प्रदेशले हालसम्म स्वर्णपदक ल्याउन सकेका छैनन् ।

लुम्बिनीले ६ रजत र चार कांस्यसहित १० पदक ल्याउँदा कर्णाली प्रदेशले एक कांस्यपदक मात्र जितेर पदक तालिकाको पुछारमा छ । नवौँ राष्ट्रिय खेलकुद प्रतियोगिताअन्तर्गत यही असोज २८ देखी प्रतियोगिताका ३६ वटा खेल भइरहेका छन् । राष्ट्रिय खेलकुद आगामी कात्तिक ३ गतेसम्म सञ्चालन हुनेछ । रासस