भोलिदेखि ‘चितवन म्युजिक फेस्ट’ सुरू, तयारी अन्तिम चरणमा

३४० पटक पढिएको

चितवन – अंग्रेजी नयाँ वर्ष २०२३ को अवसर पारेर नारायणगढको क्याम्पाचौरमा आयोजना गर्न लागिएको ‘चितवन म्युजिक फेस्ट’ को तयारी अन्तिम चरणमा पुगेको छ ।

डिजिफ्लाई ब्राण्डिङ एजेन्सी र एस्ट्रल युथ सोसाइटी भरतपुरको संयुक्त आयोजनामा गर्न लागिएको कार्यक्रमको तयारी अन्तिम चरणमा पुगेको आज आयोजित पत्रकार सम्मेलनमा जानकारी गराईएको थियो। कार्यक्रम भोलि पौष १६ र १७ गते (डिसेम्बर ३१ र जनवरी १ तारिख) मा हुँदैछ।

पहिलो दिन शनिबार नबिन के भट्टराई, कालीप्रसाद बास्कोटा र दि इलिमेन्ट्सको प्रस्तुति रहनेछ । दोस्रो दिन सविन राई, कबवेब ब्याण्ड र कट्टवले दर्शक झुमाउनेछन् । यस्तै स्थानीय कलाकारहरुको पनि प्रस्तुति रहने उनले बताए ।

कार्यक्रम परिसर भित्र १७ वटा स्टलहरु रहनेछन्।  खाना, गेम र फेस पेन्टिङका ती स्टलहरु नि:शुल्क रुपमा उपलब्ध गराइनेछ र व्यवसायीहरुले कार्यक्रम प्रायोजकको उत्पादन मात्रै बिक्री गर्नुपर्ने उनले बताए । खल्ती एप तथा चितवनका बिभिन्न रेष्टुरेण्टहरू बाट पनि टिकट खरिद गर्न सकिने उनले बताए ।

कार्यक्रमका लागि पाँच सय र एक हजार रुपैयाँको टिकटको व्यवस्था गरिएको छ । दुई दिनमा दश हजार दर्शकले कार्यक्रम अवलोकन गर्ने अनुमान गरिएको डिजिफ्लाईका सिईओ प्रसुन श्रेष्ठले बताए । कार्यक्रम सम्पन्न गर्नका लागि ६५ लाख रुपैयाँ खर्च हुने अनुमान गरिएको छ ।