दर्ता नभएका अनलाइन व्यापारीबाट सामान नकिन्न विभागको सुझाव

१८६ पटक पढिएको

काठमाडौँ । अनलाइन व्यापारको नाममा ग्राहक झुक्क्याउनु बिरुद्ध अब सरकार कठोर बन्ने भएको छ । वैशाख २४ गते आइतबार वाणिज्य तथा आपूर्ति मन्त्रालय वाणिज्य अन्तर्गतको आपूर्ति तथा उपभोक्ता संरक्षण विभागले एक सूचना जारी गर्दै त्यस्तो कार्य नगर्न चेतावनी दिएको हो ।

समान खरिद गर्नु अघि एउटा कुरा र बिक्री गरिसकेपछि अर्को कुरा गर्ने अनलाइन व्यापारीहरूले आम उपभोक्तालाई ठगी गर्ने ए दुख दिने गरेको पाइएपछि विभागको आपूर्ति अनुगमन संरक्षण शाखाले कारबाहीको चेतावनी सहित सूचना जारी गरेको हो ।

विद्युतीय पोर्टलहरूबाट अनलाइन व्यापार व्यवसाय सेवा प्रवाह गर्ने कतिपय संस्थाहरूले अनलाइन सेवाबाट सामाग्री खरिद गर्दा ढुवानी रकम एक प्रकारले राख्ने र पछि अर्डरको प्रक्रिया सकिएपछि फोन गरेर अतिरिक्त शुल्क लाग्ने भनी सेवाग्राहीहरूलाई थप शुल्क तिर्न बाध्य बनाउने गरेको पाइएपछि यस्तो सूचना सार्वजनिक गरिएको विभागले जनाएको छ  ।

उक्त सूचनामा भनिएको छ – कतिपय अवस्थामा व्यवसाय सम्बन्धित निकायमा दर्ता नगरी व्यवसाय संचालन गरेको, गुणस्तरयुक्त सामाग्री भनी फोटो देखाई कमसल सामाग्री उपलब्ध गराउने गरेको भन्ने जस्ता उजुरीहरू पटक पटक पर्न आइरहने गरेको हुँदा उपभोक्ता संरक्षण ऐन २०७५ को उल्लङ्घन हुने गरी कुनै पनि कार्य नगर्नु नगराउनु हुन र सो ऐनको बर्खिलाप हुने गरि कुनै पनि क्रियाकलाप भए गरेको पाइएमा कानुन बमोजिम कारबाही भई जाने ब्यहोरा सम्बन्धित सबैको जानकारीको लागि अनुरोध छ ।

साथै आम उपभोक्ता वर्गले समेत यसरी सामाग्री वा सेवा खरिद गर्नु अगाडी खरिद गर्ने सामाग्री, त्यसको अधिकतम खुद्रा मूल्य, गुणस्तर, बिल-विजक, सुरक्षित उपभोग्य अवधि जस्ता महत्त्वपूर्ण पक्षहरूमा प्रश्न गरि ढुक्क भएर मात्र त्यस्ता सामाग्री वा सेवा खरिदको प्रक्रिया सुरु गर्नु हुन समेत विभागले सचेत गराएको छ ।