चितवनको दासढुंगामा बस दुर्घटना, १९ जना घाईते

काठमाडौं । झापाको कांकडभिट्टाबाट काठमाडौंतर्फ आउँदै गरेको रात्री बस शुक्रबार बिहान चितवनको दासढुंगामा दुर्घटना भएको छ ।

४० जना यात्रु बोकेको बस दासढुंगास्थित मदन भण्डारी पार्कनजिकै दुर्घटना भएको हो ।

बस अनियन्त्रित भई सडकबाट १० मिटर तल खसेर रुखमा अड्किएको छ । रुखले अड्काएकाले बस त्रिशूली नदीमा खस्नबाट जोगिएको जिल्ला प्रहरी कार्यालय चितवनले जनाएको छ ।

दुर्घटनामा परी १९ जना घाइते भएको र उनीहरुलाई उपचारका लागि भरतपुरका अस्पतालहरुमा पुर्‍याइएको पनि प्रहरीले जनाएको छ ।

पुरानो मेडिकल कलेजमा १० जना र भरतपुर सरकारी अस्पतालमा आठ जनाको उपचार भईरहेको र एक जना उपचारका लागि आफैं काठमाडौं गएको प्रहरीले जनाएको छ ।