असोज महिनाको हरेक बुधबार मौलाकाली केवलकारको टिकटमा पचास प्रतिशत छुट

३४५ पटक पढिएको

गैँडाकोट। मौलाकाली केवलकारले आफ्नो टिकटमा ५० प्रतिशत छुट सहित नयाँ अफर ल्याएको छ ।

भोलिदेखि आश्विन महिनाभरका लागि यो अफर ल्याएको मौलाकाली केवलकारका स्टेशन मेनेजर सुरज पौडेलले बताउनुभयो।

यसअघि गत साउनदेखि संचालित इभिनिङ अफरलाई परिस्कृत गर्दै बुधबार दिनभरका लागि नै टिकटमा ५० प्रतिशत छुट सहित Wednesday Offer ल्याईएको हो।

पौडेलले भन्नुभयो “ईभिनिङ अफरप्रति आम यात्रुले दर्शाएको सद्भाव र प्रतिक्रिया स्वरूप यो अफर ल्याइएको र यस अफरबाट अझ धेरै यात्रु तथा भक्तजन लाभान्वित हुने विश्वास लिएका छौँ। हाल केवलकारको दुईतर्फी साधारण टिकट मूल्य रु. ५५० कायम छ । यस अफर अन्तर्गत अब यात्रुहरुले रु. २७५ मै केवलकारको दुईतर्फी यात्रा गर्न पाउनेछन् । यसैबीच गत आइतबारदेखि शुरु भएको केवलकारको नियमित मर्मतसम्भार कार्य पनि सकिएको कम्पनीले जनाएको छ । मर्मतसम्भार सकिएपछि अब आश्विन १ गतेदेखि केवलकार पूर्ववत समय तालिका अनुसार नै संचालन हुनेछ।

जस अनुसार केवलकार हरेक दिन बिहान ६ बजेदेखि साँझ ६ बजेसम्म संचालन हुनेछ भने शनिबार र बिदाका दिनमा बिहान ५:३० बजेदेखि संचालन हुनेछ ।