“दिमाग खराब”को प्रदर्शन नरोकिने, निर्माता र चलचित्र संघबीच भयो यस्तो सहमति

१५० पटक पढिएको

चलचित्र ‘दिमाग खराब’ मंगलबारसम्म फिल्म हलहरूमा प्रदर्शन हुने भएको छ।

विदेशी चलचित्र सरह शो नदिइएको भन्दै निर्माता र निर्देशकले ‘दिमाग खराब’को प्रदर्शनी रोक्ने घोषणा गरेका थिए।

निर्माता रौनकविक्रम कँडेल र निर्देशक निश्चल बस्नेतले विज्ञप्ति जारी गर्दै हलहरूको अन्यायपूर्ण व्यवहारका कारण चलचित्रको प्रदर्शन रोक्ने घोषणा गर्नुपरेको बताएका थिए।

उक्त घोषणापछि बिहीबार नेपाल चलचित्र संघ र ‘दिमाग खराब’को निर्माताहरूबीच छलफल भएको हो।  संघका महासचिव नरेन्द्र महर्जनले विज्ञप्ति जारी गर्दै छलफल सकारात्मक भएको बताएका छन्।

यस्तै बाँकी विषयमा आउँदो मंगलबार पुन: छलफल गर्ने र त्यतिञ्जेल चलचित्र पनि प्रदर्शन जारी राख्ने निर्णय भएको हो।

चलचित्र यही कात्तिक २४ गतेदेखि प्रदर्शनीमा आएको थियो।