यमनसँग नेपाल पराजित

१४८ पटक पढिएको

काठमाडौं । फिफा विश्वकप छनोटको दोस्रो चरणको दोस्रो खेलमा यमनले नेपाललाई मंगलबार दशरथ रंगशालमा भएको खेलमा २–० ले पराजित गरेको छ । पहिलो हाफ बराबरी भए पनि दोस्रो हाफमा यमनले एकपछि अर्काे आक्रमण बुनेको थियो । खेलको ७२औं मिनेटमा यमनका लागि ओमर अब्दुल अल दाहीले सानदार गोल गर्दै खाता खोलेका थिए ।

खेलको ९०औं मिनेटमा नेपालको रक्षापंक्तिलाई विट गर्दै यमनका मोहम्मद अब्दुल अल दाहीले दोस्रो गोल गरेसँगै मंगलबार दशरथ रंगशालामा नेपाली टिमको समर्थनमा उपस्थित १३ हजार ७ सय ३५ दर्शक निराश भएर फर्के । दोस्रो हाफको अधिकांश समय यमनले बल कब्जा गरेको थियो । नेपालको प्रदर्शन निकै कमजोर देखिएको थियो ।

पाँच राउन्डसम्म हुने छनोट खेलमा नेपाल पहिलो चरण पार गरेर दोस्रो चरण प्रवेश गरेको हो । दोस्रो चरणको पहिलो खेलमा नेपाल यूएईसँग ४–० ले पराजित भएको थियो । पहिलो राउन्डमा भने नेपालले लाओसलाई समग्रहमा २–१ ले हराएर दोस्रो चरण पुगेको हो । दोस्रो चरणमा नौवटा समूह विभाजन भएको छ । जसमा नेपाल समूह ‘एच’मा छ । नेपाल रहेको समूहमा यूएई, बहराइन र यमन छन् । समूहका शीर्ष दुई टिम विश्वकपको तेस्रो चरणको छनोट प्रतियोगिताका लागि चयन हुनेछन् ।

मंगलबार नेपालले सुरुमै अग्रता लिने अवसर गुमाएको थियो । पहिलो हाफमा केही आशालाग्दो प्रदर्शन गरेको टिमले दोस्रो हाफमा फितलो प्रदर्शन ग¥यो । खेलको तेस्रो मिनेटमा जिलेस्पीजंग कार्की गोल गर्नबाट चुकेका थिए । उनले खेलको ११औं मिनेटमा नै अवसर पाएका थिए । दिनेश हेन्जनले दिएको क्रसमा जिलेस्पीले हेड गर्न नसक्दा अवसर गुम्यो ।

दिनेशले खेलको २८औं मिनेटमा पनि अर्काे मुभ सिर्जना गरेका थिए, त्यो पनि खेर गयो । दिनेशले पहिलो हाफमा राम्रो खेल प्रदर्शन गरेका थिए । यमनले पहिलो हाफमा पनि एकपछि अर्काे आक्रमण बुनेको थियो । नेपालले यमनसँग सन् २०१४ देखि तीन खेल खेलेको थियो, जसमा दुई खेल यमनले जितेको छ भने एक बराबरी भएको छ । राजधानी दैनिकबाट