एक्सपर्ट भरतपुर मेयर्स कपः अर्किड लगातार जितसंगै सेमीफाइनलमा,लक्ष्मी माविको सान्त्वना जित

१९४ पटक पढिएको

चितवन, फागुन १२– एक्सपर्ट भरतपुर मेयर्स कप अन्तरविद्यालय क्रिकेट प्रतियोगिताको लिगमा चरणमा लगातार जितसंगै अर्किड सेकेण्डरी स्कुल सेमीफाइनल प्रवेश गरेको छ भने लक्ष्मी माविले सान्त्वना जित निकाल्दै प्रतियोगिताको सुखद अन्त्य गरेको छ ।

आज (शनिबार) आफ्नो लिग चरणको अन्तिम खेलमा इडेन गार्डेन स्कुललाई १०८ रनको फराकिलो अन्तरले पराजित गर्दै समूह ‘बी’को विजेताको रुपमा सेमीफाइनल स्थान सुरक्षित गरेको हो ।

अर्किड लिग चरणमा सनराइन इङलिस स्कुल, प्रभात मावि, विश्वप्रकाश मावि र इडेन गार्डेन स्कुललाई पराजित गर्दै ४ खेलमा ८ अंक बटुल्दै समूहको शीर्ष स्थानमा रहन सफल भयो ।

यो समूहबाट समूह उपविजेताको रुपमा सनराइन इङलिस स्कुल सेमीफाइनल पुग्ने उच्च संभावना रहेको छ । सनराइन ३ खेलमा ४ अंकका साथ दोस्रो स्थानमा रहेको छ भने अन्तिम खेलमा भोलि प्रभात माविसंग खेल्नेछ ।
अर्किडले शनिबार इडेन गार्डेन विरुद्धको अन्तिम खेलमा टस जिते पहिले व्याटिङ रोज्दै १९० रनको लक्ष्य पेश गरेको थियो । अर्किडका लागि सगुन सापकोटाले अर्किडका लागि शतकिय इनिङ खेले । उनले ७१ बलमा १०९ रन बनाएर आउट भए । सगुनको शतक यस प्रतियोगिताको पहिलो र एक मात्र रहेको छ । मन्दिप बरालले १६ बलमा २२ रनमा अविजित रहे । इडेन गार्डेनका लागि प्रवेश अधिकारीले २ र अवि सिंहले एक विकेट लिए ।
१९० रनको विशाल लक्ष्य पछ्याएको इडेन गार्डेन ८१ रनमै अलआउट हुन पुग्यो । उसका लागि विपिन रानामगरले सर्वाधिक २२ रन कुशल ठेनीले २० रन बनाए । इडेन गार्डेनलाई सस्तैमा समेट्न अर्किडका सन्देश सुवेदीले ४ ओभरमा १६ रन मात्रै खर्चिदै महत्वपूर्ण ५ विकेट लिए भने सगुन सापकोटाले बलिङबाट पनि ४ ओभरमा १२ रन खर्चिदै ४ विकेट लिन सफल भए । सगुन खेलको प्लेयर अफ दि म्याच घोषित भए । प्रतियोगितामा भोलि हुने सनराइन र प्रभात माविको खेलमा सनराइन विजयी भएको खण्डमा भने इडेन गार्डेनले विश्वप्रकाश माविसंग खेल्ने अन्तिम खेल सान्त्वन जितको लागि मात्रै हुनेछ । इडेन गार्डेन ३ खेलमा २ अंक मात्रै बटुल्न सकेको छ ।
यसैबीच आज (शनिबार) नै भएको समूह ‘ए’ अन्तरगतको दोस्रो खेलमा लक्ष्मी माविले सान्त्वना जित निकालेको छ । आफ्नो अन्तिम खेलमा लक्ष्मी माविले गंगानगर माविलाई ९ रनको झिनो अन्तरले पराजित गर्दै प्रतियोगितामा सुखद अन्त्य गरेको छ । टस जितेर पहिले व्याटिङ गरेको लक्ष्मी मावि १८.२ ओभरमा अलआउट हुँदै ८५ रन बनायो । उसका लागि भविन्द्र रोकायले २३ र कुन्दन यादवले १६ रन बनाए । गंगानगर माविका लागि उर्बर तामाङले ४ ओभरमा एक मेडनसहित १४ रन खर्चिएर ४ विकेट लिए भने रुपेश महतोले आफ्नो पहिलो ओभरको लगातार दुई बलमा दुई विकेट लिए ।
८६ रनको लक्ष्य पछ्याएको गंगानगर मावि १३.४ ओभरमा ७६ रनमा अलआउट भयो । उसका लागि विश्वास तामाङले २८, मोहित विकले १० रन बनाए । गंगानगरलाई अलआउट गर्न कुन्दन यादवले ४ ओभरमा १५ रन खर्चिदै ४ विकेट लिए भने समीर गैरेले २.४ ओभरमा १० रन खर्चिदै ३ विकेट लिए । खेलमा लक्ष्मी माविका कुन्दन यादव प्लेयर अफ दि म्याच घोषित भए ।
यस समूह ‘ए’बाट लगातार ३ खेलबाटमा जित निकाल्दै वाल्मीकि शिक्षा सदन ६ अंकको साथ शीर्ष स्थानमा रहेको छ भने नारायणी नमुना मावि ४ खेलमा ३ जितका साथ ६ अंक जोड्दै दोस्रो स्थानमा रहेको छ भने अंकुरम एकेडेमी ३ खेलबाट ४ अंकका साथ तेस्रो स्थानमा रहेको छ । यस समूहको अन्तिम खेलमा भोलि (आइतबार) दिउँसो १ बजे वाल्मीकि र अंकुरम एकेडेमीबीच प्रतिस्पर्धा हुनेछ । यस खेलमा अंकुरम विजयी भए तीनै टोलीको समान ६ अंक हुनेछ भने नेटरनरेटको आधारमा सेमीफाइनल पुग्ने दुई टोलीको टुंगो लाग्नेछ । अंकुरम पराजित भएमा वाल्मीकि र नारायणी सेमीफाइनल प्रवेश गर्नेछ ।
भोलि (आइतबार) पहिलो खेलमा सनराइज सेकेण्डरी स्कुल र प्रभात माविबीच प्रतिस्पर्धा हुनेछ ।
भरतपुर महानगरपालिकाको आयोजना, चितवन जिल्ला क्रिकेट संघको सह–आयोजना र एक्सपर्ट एजुकेशन एन्ड भिजा सर्भिसेज चितवनको मुख्य प्रायोजनमा प्रतियोगिता संचालन भइरहेको प्रतियोगिताको फाइनल खेल फागुन १९ गते शनिबार हुनेछ ।