सपना भिलेज सोसियल इम्प्याक्टद्धारा ७६ घरधुरीलाई सुधारिएको चुलो वितरण

३०७ पटक पढिएको

कालिका – सौराहा स्थित सपना भिलेज सोसियल इम्प्याक्टले कालिका नगरपालिका वडा नं. २ भरिका ७६ घरधुरीलाई बुधवार सुधारिएको चुलो वितरण गरेको छ ।

कालिका नगरपालिकाका नगर प्रमुख विनोद रेग्मी, नगर उपप्रमुख विमला तामाङ, वडा अध्यक्ष लक्ष्मण पौडेल, ईम्प्याक्टका अध्यक्ष ध्रुव गिरी, वडा सदस्यहरूले संयुक्त रूपमा विपन्न समुदायलाई चुलो हस्तान्तरण गर्नुभएको थियो ।

सपना भिलेज सोसियलल ईम्प्याक्टका अध्यक्ष गिरीले सामुदायिक बनबाट दाउरा पाउन समेत गाह्रो र दाउराबाट पकाउँदा धुवाले असर गर्ने भएकाले थोरै रकम लिएर वडावासीहरूलाई सुधारिएको चुलो वितरण गरेको जानकारी दिनुभयो । रत्न नगर– ८ चित्रसारीमा चुलो निर्माण गर्ने उद्योग सञ्चालन गरेको उहाँको भनाई छ । रु २५ सय पर्ने यो चुलो वडावासीहरूलाई न्यूनतम शुल्क लिएर वितरण गरेको उहाँले बताउनुभयो ।

सुधारिएको चुलोबाट ७५ देख ८० प्रतिशत सम्म धुवा कम निस्कने भएकाले मानव स्वास्थ्यलाई असर नगर्ने जानकारी दिनुभयो । कार्यक्रमका प्रमुख अतिथि नगर प्रमुख रेग्मीले सपना भिलेजले कालिकाका नगर पालिकासँग विभिन्न सहकार्य गर्दै आएकोमा आगामी दिनहरुमा पनि यस्तै सहकार्य गर्दै जाने प्रतिबद्धता व्यक्त गर्नुभयो । प्राप्त गर्ने वडावासीहरूलाई पाएको सुधारिएको चुलोको सही सदुपयोग गर्न आग्रह गर्नुभयो । वडा अध्यक्ष लक्ष्मण पौडेलले सुधारिएको चुलो मानवको स्वास्थ्य देखि वातावरण शुद्धता राख्न मद्दत गर्ने भएकाले वडावासीलाई चुलो वितरण गरिएको बताउनुभयो ।

सुधारिएको चुलोको प्रयोगले दाउरा कम प्रयोग हुने भएकाले केही मात्रामा वन जङ्गल जोगिने बताए । कार्यक्रममा, वडा सदस्य चित्र बहादुर भण्डारी, शान्ति महतो, चन्द्र रेखा वि.क, बेली कुमारी गुरुङ लगाएको उपस्थिति रहेको थियो । यो सँगै सपना भिलेजले इच्छा कामना र रत्न नगरका एक हजार ५० घरधुरीलाई चुलो वितरण गरिसकेको छ ।