पञ्जाबलाई हराउँदै रोयल च्यालेन्जर्स पहिलोपटक आईपीएल च्याम्पियन

९१ पटक पढिएको

काठमाडौं- इन्डियन प्रिमियर लिग (आइपिएल) मा रोयल च्यालेन्जर्स बैंग्लोरले आफ्नो पहिलो उपाधि जितेको छ ।

मंगलबार राती सम्पन्न फाइनल खेलमा टोलीले पञ्जाब किंग्सलाई छ रनले पराजित गर्दै उपाधी हात पारेको हो । यससँगै आइपिएलले १८औं सिजनमा आठौं च्याम्पियन टोली पाएको छ ।

यसअघि चेन्नई सुपर किंग्स (पाँच पटक), मुम्बई इन्डियन्स (पाँच पटक), कोलकाता नाइट राइडर्स (तीन पटक), राजस्थान रोयल्स (एक पटक), डेक्कन चार्जर्स (एक पटक), सनराइजर्स हैदराबाद (एक पटक) र गुजरात जायन्ट्स (एक पटक) च्याम्पियन बनिसकेका छन् ।

अहमदाबादको नरेन्द्र मोदी रंगशालामा १ सय ९१ रनको लक्ष्य पछ्याएको पञ्जाबले सात विकेट गुमाउँदै १ सय ८४ रन मात्र बनाउन सक्यो । पञ्जाबका सशंक सिंहले सर्वाधिक ६१ रन बनाए । अविजित रहेका उनले ३० बलमा तीन चौका र छ छक्का प्रहार गरे ।

जोश इङ्लिसले २३ बलमा एक चौका र चार छक्कासहित ३९ रन बनाए । प्रभसिमरन सिंहले २२ बलमा दुई छक्कासहित २६ रन बनाए । प्रियांश आर्य २४ र नेहल वधेरा १५ रनमा आउट भए । बैंग्लोरलाई उपाधि दिलाउन भुवनेश्वर कुमार र कृणाल पाण्ड्याले समान दुई विकेट लिएका थिए ।