वर्तमान प्रेमका शाब्दिक परिभाषाहरु (कविता)

सी.जी. “निर्मलश्री”

सबैभन्दा !
अधिक त्यो प्रेम
असफल भयो
जो एकनिष्ठ थियो,
एकाग्र थियो
एउटैसँग प्रेममा
समर्पण हुनुपर्छ भन्ने
आदर्शमा विश्वास राख्थ्यो ……..
..
..
सबैभन्दा !
अधिक त्यो
भावनामाथि छलभयो
जो निष्ठापूर्वक रहेको थियो
जसलाई जसले
जीवन् भर पर्खिन
चाहिरहेको थियो …….
..
..
सबैभन्दा !
अधिक त्यही
आँखाहरु रोईरहे
जो सँधै आशमा बसे,
कल्पनामा रोईएका आँशुहरु
पुछ्दै
नाटकीय संवेगमा
भक्कानिएका मनलाई
सान्त्वना दिँदै
अस्तित्वविहीन
समर्पणलाई सम्झिँदै
आँखा बर्षाई रहे……
..
..
सबैभन्दा !
अधिक त्यही उम्मिद
ढलेर गयो
जो निश्चल थियो
निर्विकल्प थियो
आत्मीय थियो
र जीवन जीवनसम्म
एउटैका साथमा बसिन्छ भन्ने
उम्मिदमा बाँचिरहेको थियो…….
..
..
निष्कर्षत :
के देख्न सकिन्छ भने
वर्तमान परिप्रेक्ष्यमा
छलयुक्त प्रेम नै सच्चा मानिन्छ
यही टिक्न सक्छ
छलमुक्त प्रेम !
हठात त्यागिन्छ,
कौडीको भाउमा फ्याँकिएको हुन्छ
लाग्छ अचेल
जिन्दगी र प्रेम
ठग्न सक्ने र तौलन सक्नेको
हातमा मात्र सीमित छ …….

(चतुर्भुज गौतम)
टीकापुर १, कैलाली
हाल मणिग्राम, रुपन्देही