छत्रकोट गाउँपालिकाले एसईईमा ४ जीपीए ल्याउनेलाई १ लाख ५१ हजार पुरस्कार दिने

पालिकाले आर्थिक वर्ष २०८२/०८३ सालको लागि प्रस्तुत नीति कार्यक्रम अनुसार शैक्षिक सत्र २०८१ को एसईई परीक्षा दिएका विद्यार्थीहरूलाई जिपिए अनुसार नगद पुरस्कार दिने भएको हो ।

उत्कृष्ठ नतिजा ल्याउने विद्यार्थीलाई प्रोत्साहन गर्न र भविष्यमा अझ राम्रो नतिजा ल्याउन प्रेरणा दिन पुरस्कार योजना ल्याइएको उनले बताए । यो योजनाले विद्यार्थीहरूमा सकारात्मक प्रतिस्पर्धा सिर्जना गर्ने विश्वास लिइएको उनको भनाइ छ ।

अभियानअन्तर्गत स्थानीय सरकारका गतिविधिहरू विद्यालय तथा समुदायसम्म, र विद्यालय एवं समुदायका गतिविधिहरू गाउँपालिकासम्म प्रभावकारी रूपमा आदानप्रदान गराउने उद्देश्यले अध्यक्षसँग विद्यार्थी भेटघाट कार्यक्रमलाई निरन्तरता दिइने भएको छ ।

गाउँपालिकाले माध्यमिक शिक्षा परीक्षा एसईई मा ३.२ जीपीएभन्दा माथि नतिजा ल्याउने विद्यार्थीहरूलाई कक्षा ११ र १२ का लागि पूर्ण छात्रवृत्ति दिने कार्यक्रमलाई निरन्तरता दिने जनाएको छ ।

यस कदमले मेधावी तर आर्थिक रूपमा कमजोर वर्गका विद्यार्थीहरूलाई उच्च माध्यमिक शिक्षामा सहज पहुँच दिलाउने अपेक्षा पालिकाको छ । यस्तै उच्च शिक्षामा विद्यार्थीहरूको पहुँच विस्तार गर्ने उद्देश्यले छत्रकोट गाउँपालिकामा रहेको एकमात्र क्याम्पस- दिगाम आदर्श बहुमुखी क्याम्पसमा स्नातक तह अध्ययन गर्ने विद्यार्थीलाई मासिक शुल्क गाउँपालिकाले बेहोर्ने कार्यक्रम पनि यथावत् राखिने भएको छ ।

शैक्षिक विकासलाई प्राविधिकतर्फ समेत लैजाने योजनाअनुसार छत्रकोट गाउँपालिका वडानम्बर–४ मा अवस्थित श्रृङ्गा जनता माध्यमिक विद्यालयमा प्राविधिक शिक्षा पठनपाठन सञ्चालन गर्न आवश्यक पहल थालिने भएको छ ।

गाउँपालिकाले यस्ता कार्यक्रमहरूबाट विद्यार्थीहरूलाई गुणस्तरीय शिक्षा प्रदान गर्दै आत्मनिर्भर र दक्ष जनशक्ति उत्पादनमा योगदान पुग्ने विश्वास लिएको छ ।