फिल्म ‘माग्ने राजा’ को फर्स्टलुक पोस्टर सार्बजनिक

१३० पटक पढिएको

काठमाडौँ- नेपाली फिल्म ‘माग्ने राजा’ को फर्स्टलुक पोस्टर आज सार्बजनिक गरिएको छ ।

शुक्रबार आज प्रज्ञा डबलीमा आयोजित एक कार्यक्रमका बिच तीनवटा पोस्टर सार्बजनिक गरिएको हो।

कार्यक्रममा अभिनेता केदार प्रसाद घिमिरे ‘माग्ने बुढा’ फिल्मकै गेटअपमा उपस्थित भएका थिए ।

तीनमध्ये एक पोस्टरमा केदार कुर्सीमा पैसासहित रिसाहा मुद्रामा बसेका छन् । पहेँलो सर्ट र पाइट लगाएका उनको गलादेखि हातका औंलासम्म सुनै सुन देखिन्छ । उनको यही गेटअप अन्य दुई पोस्टरमा पनि छ । दोस्रो पोस्टरमा उनीसहित वर्षा सिवाकोटी र विल्सन विक्रम राई चित्रित छन् । वर्षाले सुटकेस बोकेकी छन् भने विल्सन दुई हातमा पैसा समातेर खुसी मुद्रामा देखिएका छन् ।

तेस्रो पोस्टरमा केदार र वर्षालाई पैसाको बन्डलसहित अचम्मित भावमा देख्न सकिन्छ । यो पोस्टर भने केही दिनपछि सार्वजनिक गरिने जनाइएको छ । तीनवटा पोस्टरले फिल्मको कथा पैसाको वरिपरि घुमेको संकेत गर्छ । धनी बन्ने महत्त्वाकांक्षाको कथामा फिल्म बनेको निर्देशक ऋषि लामिछानेले बताए। उनले भने ‘माग्ने राजा’ले केदार घिमिरेको करिअरलाई अझ उचाइमा पुर्‍याउने छ ।

दाङको घोराही उपमहानगरपालिका-४ का वडा अध्यक्ष समेत रहेका मुनाल घिमिरेको लगानीमा बनेको यो फिल्ममा पुष्कर गुरुङ, शिशिर वाङ्देल, शारदा गिरी, पवित्रा साकी (मिस पबी) लगायतको पनि अभिनय छ भने विशेष भूमिकामा आर्यन सिग्देल छन् । फिल्ममा नरेन्द्र मैनालीको छायांकन, सामीप्यराज तिमल्सेनाको लेखन तथा दीपक शर्मा र बाबुल गिरीको गीतमा संगीत रहेको छ ।