यमन नागरिकलाई टुक्रा पारेर ट्यांकीमा फाल्ने भारतीय नर्सलाई फाँसी दिईँदै

७२५ पटक पढिएको

काठमाडौं । यमनी नागरिकको हत्या मुद्दामा भारतीय नर्स निमिषा प्रियालाई आजको एक सतामा फाँसी दिइने भएको छ।

गत वर्ष यमनका राष्ट्रपति रसाद अल–अलिमीले उनको मृत्युदण्ड सजायलाई अनुमोदन गरेका थिए।

यमनी नागरिक तलाल अब्दो महदीलाई लागूऔषधको ओभरडोज दिएर हत्या गरेको कसुरमा भारतको केरला घर भएकी निमिषा २०१७ देखि यमनको जेलमा छिन्।

निमिषा र महदी यमनको एक निजी क्लिनिकमा साझेदार थिए। महदीले निमिषाको राहदानी कब्जा गरेको र उनलाई अति नै यातना दिएपछि निमिषाले उनको हत्या गरेको स्वीकार गरेकी छन् ।

२००८ मा यमन पुगेकी केरलाको पलक्कडकी १९ वर्षीया निमिषा प्रियाले राजधानी सानाको एक सरकारी अस्पतालमा नर्सको जागिर पाइन्।
२०११ मा विवाहका लागि भारत फर्किएकी निमिषाले कोच्ची निवासी टमी थोमससँग विवाह गरिन् र दुवै यमन गए।

२०१२ मा छोरी मिसाल जन्मेपछि आर्थिक अवस्था कमजोर भएको भन्दै २०१४ मा थोमस आफ्नी छोरीसँग भारत कोच्ची फर्किए ।
निमिषाले आफ्नो कम तलब भएको भन्दै जागिर छाडेर यमनी कानून अनुसार स्थानीय पार्टनर खोजेर क्लिनिक खोल्ने निर्णय गरिन् ।
त्यसपछि श्रीमान र छोरीलाई पनि भेट्ने र नयाँ व्यवसायका लागि आर्थिक संकलन पनि गर्ने भन्दै उनी क्लिनिकमा पार्टनर बनाउन लागेको कपडा पसल गर्ने महदीलाई २०१५ मा लिएर भारत आईन् ।

त्यहि बेला महदीले निमिषाको विवाहको फोटो चोरे र पछि महदीले तस्बिर बिगारेर आफू नै निमिषाको श्रीमान् भएको दाबी गरे।

त्यसपछि सुरु हुन्छ उनीहरुबीचको लफडा । क्लिनिक सुरु गर्न निमिषाले परिवार र साथीभाइबाट करिब ५० लाख रुपैयाँ जम्मा गरेर यमन पुगेकी थिइन् ।

निमिषाले आफ्ना श्रीमान् र छोरीलाई यमन बोलाउन कागजी प्रक्रिया सुरु गरिन्, तर मार्चमा त्यहाँ गृहयुद्धका कारण भारतले त्यहाँबाट आफ्ना नागरिक बाहिर निकाल्न अपरेसन नै चलायो ।

श्रीमान र छोरीलाई यमन लान नपाएकी निमिषा झण्डै पाँच हजार भारतीय नागरिक फर्किदा भारत फर्कन पनि पाइनन्।

२०१६ मा महदीले निमिषालाई शारीरिक दुर्व्यवहार गर्न थाले। उनले निमिषाको क्लिनिकबाट हुने नाफा पनि हडप्न थाले । निमिषाले यसबारे उनलाई प्रश्न गरिन्, तब उनीहरूको सम्बन्ध बिग्रियो।

उनले निमिषाको राहदानी आफूसँगै राखे। निमिषाले महदीविरुद्ध प्रहरीमा जाहेरी पनि दिइन्, तर महदीले सम्पादित तस्बिर देखाएर आफू नै निमिषाको पति भएको दाबी गरेपछि प्रहरीले उल्टै निमिषालाई ६ दिन हिरासतमा राख्यो।

महदीले अत्यन्तै पिडा दिएपछि निमिषाले जुलाई २०१७ मा महदीबाट राहदानी लिन निमिषाले उनलाई बेहोस बनाउने सुई लगाइदिइन्, तर त्यसले काम गरेन। त्यसपछि निमिषाले महदीलाई ओभरडोज दिन्छिन्, परिणामस्वरूप उनको मृत्यु हुन्छ।

मिडिया रिपोर्टअनुसार निमिषाले महदीको शव टुक्रा–टुक्रा पारेर पानीट्यांकीमा फ्याँकिदिएकी थिइन्। यसपछि प्रहरीले निमिषालाई पक्राउ गर्‍यो।

यमनको सर्वोच्च न्यायिक परिषद्ले महदीको हत्या कसुरमा निमिषालाई मृत्युदण्डको सजाय सुनाएको हो। निमिषाले यमनको सर्वोच्च अदालतमा माफीका लागि अपिल गरेकी थिइन्, तर जुन २०२३ मा त्यो खारेज गरियो।

भारतीय सञ्चारमाध्यमका अनुसार भारत सरकारले यस विषयमा नजर राखिरहेको छ र स्थानीय अधिकारी तथा निमिषाको परिवारसँग निरन्तर सम्पर्क गरिरहेको छ।

अवको एक सातामा उनको मृत्युदण्ड तय भएकाले भारत सरकारले चाहेर पनि निमिषालाई बचाउने सम्भावना न्यून रहेको अन्नर्राष्ट्रिय सञ्चारमाध्यमहरुले जनाएका छन् । – एजेन्सीको सहयोगमा