गुल्मीका न्यौपाने लण्डनको वेम्बली स्टेडियमभित्र मृत फेला

काठमाडाैँ । बेलायतको लन्डनस्थित वेम्बली स्टेडियमभित्र कार्यरत २७ वर्षीय नेपाली युवा विपिन न्यौपाने मृतावस्थामा फेला परेका छन्।

लण्डनको हिथ्रो एयरपोर्ट नजिक हन्सलोमा बस्दै आएका मृतक वेम्बली स्टेडियमभित्र एक कोठामा शनिबार दिउँसो मृतावस्थामा  फेला परेका हुन् ।

एक वर्षअघि अध्ययनका लागि बेलायत आएका न्यौपाने नेपालदेखिकै साथीहरूका साथमा लन्डनको हन्सलोमा बस्दै आएका थिए ।

सेन्ट जोन युनिभर्सिटी योर्कबाट मास्टर्स पूरा गरेपछि उनले हालै पिएसडब्लु भिसा लिएर फुलटाइम काम गर्ने गरेका थिए । लन्डनको कुनै एक क्लिनिङ कम्पनीका लागि कार्यरत न्यौपाने वेम्बली स्टेडियममा खटिएका थिए । काममा समेत उनी प्रमोट भएर सुपरभाइजर बनेका थिए ।

लन्डनस्थित नेपाली दूतावास, बेलायतमै बस्ने मृतकका आफन्त र संगै बस्दै आएका साथीहरुसमेतको सम्पर्कबाट प्राप्त जानकारीअनुसार घटनाबारे बेलायती प्रहरीले अनुसन्धान अघि बढाएको छ । तर प्रारम्भिक रुपमा अरु कसैको संलग्नता नरहेको बताइएको छ ।

लन्डनस्थित नेपाली दूतावासले पनि मृतकको परिवारसँग सम्पर्क भएको र यहाँको सबै अनुसन्धान तथा प्रक्रिया पूरा भएपछि नेपाल शव पठाउनेबारे आवश्यक समन्वय गरिने जनाएको छ । गुल्मीको जोहाङ पुर्ख्यौली घर भएका न्यौपानेको परिवार नेपालको रुपन्देहीस्थित  मणिग्राममा बस्दै आएको छ ।

बाबुआमाका मात्र दुई सन्तानमध्ये मृतक परिवारका एक्ला छोरा थिए भने उनकी एक दिदी अहिले जापानमा कार्यरत छन् ।