नेपालमा जापानिज इन्सेफ्लाइटिसका कारण २० जनाको मृत्यु, १ सय ३ जना संक्रमित

५८ पटक पढिएको

काठमाडौँ- लामखुट्टेको टोकाइबाट भएको जापानिज इन्सेफ्लाइटिसले नेपालमा हालै मात्र २० जनाको मृत्यु भएको छ ।

स्वास्थ्य सेवा विभागको परिवार कल्याण महाशाखा बालस्वास्थ्य तथा खोप शाखाका अनुसार नेपालमा जापानिज इन्सेफ्लाइटिसबाट संक्रमितको संख्या पनि बढ्दै गएको छ।

लामखुट्टेका कारण जापानिज इन्सेफलाइटिसको सङ्क्रमण बढ्दै गएको र अहिले पनि १०३ जनामा जापानिज इन्सेफलाइटिस संक्रमण देखिएको शाखाका प्रमुख डा अभियान गौतमले जानकारी दिनुभयो ।

डा गौतमले खोप नलगाएका मानिसमा जापानिज इन्सेफलाइटिसको सङ्क्रमण बढी भेटिएको बताउनुभयो । सत्तरी प्रतिशतभन्दा बढी मृत्यु १५ वर्षभन्दा माथिको उमेर समूहका बिरामीको भएको छ ।

सङ्क्रमणबाट झापा, मोरङ, तेह्रथुम, बारा, सिन्धुली, अर्घाखाँची, प्यूठान, दाङ, बर्दिया, कैलाली, रौतहट, नवलपरासीपूर्व, चितवन र नवलपरासी पश्चिममा मृत्यु भएको हो ।

क्युलेक्स प्रजातिको लामखुट्टेको टोकाइबाट जापानिज इन्सेफलाइटिस हुने गर्छ । यसले मस्तिष्कमा गम्भीर सङ्क्रमण भई बिरामीको मृत्यु हुने गरेको छ ।