कालिका माविमा भोलि खुल्ला भजन प्रतियोगिता हुँदै, प्रथम पुरस्कार १५ हजार

१५ पटक पढिएको

नवलपुर अनलाइन – नवलपुरको गैंडाकोटमा रहेका कालिका नमुना माविले भोलि मंसिर २३ गते खुल्ला भजन प्रतियोगिताको आयोजना गरेको छ।

विद्यालयको ५० औँ बार्षिकोत्सव तथा स्वर्ण जयन्तीको अवसरमा सो प्रतियोगिता आयोजना गरिएको विद्यालयका प्रधानाध्यापक होमनाथ शर्माले जानकारी दिनुभयो।

भजन प्रतियोगिताका लागि आज सोमबार दिउसो ४ बजेसम्म टीम दर्ता गर्न शर्माले आग्रह गर्नुभयो।  भोलि बिहान १० बजेदेखि भजन प्रतियोगिता शुरु हुनेछ।  एउटा भजन समूहलाई १० मिनेटको समय छुट्याईएको छ भने एउटा टीममा १० जना मात्र हुनुपर्नेछ।

भजन प्रतियोगितामा प्रथम हुने समूहले १५ हजार जीत्न सक्नेछन्। दोस्रो समूहले १० हजार, तेस्रो समूहले ७ हजार तथा सान्त्वना पुरस्कार स्वरुप ५ हजार र प्रमाणपत्र जीत्न सक्ने शर्माले बताउनुभयो।