राष्ट्रिय गाई प्रदर्शनीमा अर्जुन ढकालको गाई प्रथम

१६० पटक पढिएको

भरतपुर/अन्तर्राष्ट्रिय डेरी एक्स्पो २०८२ अन्तर्गत चौथो दिन सम्पन्न राष्ट्रिय गाई प्रर्दशनीमा १७ वटा विभिन्न कृषि फर्मबाट सहभागी गराईएको गाईहरु मध्ये कामना कृषि तथा पशुपन्छी फर्मका सञ्चालक अर्जुन ढकालको गाई प्रथम भएको छ।

शिवानी कृषि तथा पशुपन्छी फर्मका सञ्चालक शिव प्रसाद पौडेलको गाई द्वितीय, कालिका पशु विकास केन्द्रका सञ्चालक चेत प्रसाद ढकालको गाई तृतीय र नोभा कृषि फर्मका सञ्चालक पदम तिवारीको गाई सान्त्वना हुन सफल भएका छन् ।

गाई प्रतियोगिता कार्यक्रममा कृषि तथा वन विज्ञान विश्वविद्यालय, रामपुरका एशोसिएट्स प्रोफेसर डा.गोकर्ण गौतम प्रमुख निर्णायक, गाई अनुसन्धान कार्यक्रम, रामपुर राष्ट्रिय कृषि अनुसन्धान परिषद्का डा.उद्धव पनेरु, किसान आयोगका बरिष्ठ पशु विकास अधिकृत डा.खगेन्द्र सापकोटा, अमेरिकी नागरिक पशु विज्ञ डेनियल लि लेनी निर्णायक सदस्यको रुपमा रहनु भएको थियो ।
चितवन जिल्ला दुग्ध उत्पादक सहकारी संघ लि.का अध्यक्ष किशोर बगालेले स्वागत गर्नुभएको कार्यक्रमलाई राष्ट्रिय दुग्ध विकास बोर्डका कार्यकारी निर्देशक डा.राजेन्द्र यादवले निर्णायक मण्डललाई मूल्याङ्कन फारम वितरण गरी राष्ट्रिय गाई प्रदर्शनीको शुभारम्भ भएको घोषणा गर्नुभएको थियो । चितवन जिल्ला दुग्ध उत्पादक सहकारी संघ लि.का सञ्चालक सदस्य एवम् राष्ट्रिय गाई प्रतियोगिताका संयोजक युवराज थापाले संयोजन गर्नुभएको राष्ट्रिय गाई प्रदर्शनीलाई चितवन उद्योग संघका अध्यक्ष मदन घिमिरेले धन्यवाद मन्तव्य सहित समापन गर्नुभएको थियो ।
त्यस्तै, दुग्ध क्षेत्रसँग सम्वन्धित हाजिरी जवाफ प्रतियोगितामा सहभागी १८ टिमलाई पछि पार्दै त्रिवेणी दुग्ध उत्पादक सहकारी संस्था लि., भरतपुर–६, चितवन प्रथम, अन्नपुर्ण दुग्ध उत्पादक सहकारी संस्था लि., भरतपुर–६, चितवन द्वितीय, परेवाश्वरी दुग्ध उत्पादक सहकारी संस्था लि., राप्ती–२, चितवन तृतीय भएका छन् । चितवन जिल्ला दुग्ध उत्पादक सहकारी संघ लि.का सह–सचिव एवम् हाजिरीजवाफ प्रतियोगिताका संयोजक शिव प्रसाद पौडेलले स्वागत मन्तव्य राख्नुभएको कार्यक्रममा कार्यक्रम सहजकर्ता पत्रकार मनोज पन्तले हाजिरीजवाफ प्रतियोगिताको नियमहरुको विषयमा जानकारी गराउनु भएको थियो ।
त्यस्तै, सातै प्रदेशको कृषि तथा पशुपन्छी मन्त्रालयको सिफारिसमा एक–एक वटा उत्कृष्ट दुग्ध उत्पादक सहकारी सम्मान कार्यक्रम अन्तर्गत कोशी प्रदेश, उद्योग, कृषि तथा सहकारी मन्त्रालयको सिफारिमा लेटाङ दुग्ध उत्पादक सहकारी संस्था लि., मधेश प्रदेश, भूमि व्यवस्था, कृषि तथा सहकारी मन्त्रालयको सिफारिसमा श्री अन्नपूर्ण दुग्ध उत्पादक सहकारी संस्था लि., बागमती प्रदेश, कृषि तथा पशुपन्छी विकास मन्त्रालयका सिफारिसमा अन्नपूर्ण दुग्ध उत्पादक सहकारी संस्था लि., गण्डकी प्रदेश, कृषि, भूमि व्यवस्था तथा सहकारी मन्त्रालयको सिफारिसाम बाग्लुङ दुग्ध उत्पादक सहकारी संघ लि., लुम्बिनी प्रदेश, कृषि, भूमि व्यवस्था तथा सहकारी मन्त्रालयको सिफारिसमा भगवती दुग्ध उत्पादक सहकारी संस्था लि., कर्णाली प्रदेश, भूमि व्यवस्था, कृषि तथा सहकारी मन्त्रालयको सिफारिसमा हरियाली कृषि बजार सहकारी संस्था लि. र सुदूरपश्चिम प्रदेश, भूमि व्यवस्था, कृषि तथा सहकारी मन्त्रालयको सिफारिसमा खप्तड कृषि सहकारी संस्था लि.लाई सम्मान गरिएको थियो ।
त्यस्तै प्रदर्शनीको अवसरमा मिल्की वे कार्यक्रम अन्तर्गत नेपालमा दुग्ध क्षेत्रको रुपान्तरणका लागि प्रविधि र असल अभ्यास परियोजनामा उत्कृष्ट कृषक छनौट कार्यक्रम अन्तर्गत, बि एण्ड बि पशुपालन फर्म, आदर्श पशुपालन फर्म, अम्बर कृषि पशुपन्छी फर्म, बिष्ट पशुपालन फर्म, किरण कृषि तथा पशुपन्छी फर्म, मालिका पशुपालन तथा पशु विकास फर्म, न्यू रत्ननगर एग्रिकल्चर पशु फर्म, निलकण्ठ गाई फर्म, पर्वत बस्ती पशुपालन फर्म, र सुमित्रा गाई फर्म लाई सम्मान गरिएको थियो ।
चितवन उद्योग संघका अध्यक्ष मदन घिमिरे र आयोजक संस्था, चितवन जिल्ला दुग्ध उत्पादक सहकारी संघ लि.का अध्यक्ष किशोर बगालेको अध्यक्षतामा सम्पन्न कार्यक्रमलाई चितवन जिल्ला दुग्ध उत्पादक सहकारी संघ लि.सचिव कल्याण अधिकारीले सञ्चालन गर्नुभएको थियो ।