टी- २० विश्वकपको सुपर आठमा आज श्रीलंका र इङल्याण्डको भिड्दै

९१ पटक पढिएको

काठमाडौँ । जारी आईसीसी टी- २० विश्वकप २०२६ अन्तर्गत सुपर आठ अन्तर्गत आज श्रीलंका र इङल्याण्ड आमनेसामने हुँदैछन् । यो खेल श्रीलंकाको कोलम्बोमा नेपाली समय अनुसार दिउसो ३: १५ बजेदेखि हुदैछ ।

प्रतियोगिताको महत्वपूर्ण चरण भएकाले दुवै टोलीमाथि दबाब उच्च रहनेछ । हालैका खेलहरूमा इङल्याण्डको प्रदर्शन अस्थिर देखिएकाले यो खेलमा उनीहरूले अघिल्ला कमजोरी सुधार्दै बलियो पुनरागमन गर्ने लक्ष्य राखेका छन् ।

उता श्रीलंका भने उत्कृष्ट लयमा छ । लगातार दुई जित निकाल्दै आत्मविश्वास उच्च बनाएको टोलीले इङल्याण्डविरुद्ध पनि विजयी यात्रा कायम राख्ने योजनामा छ । यद्यपि, अनुभवी र सन्तुलित इंग्लिश टोलीलाई हराउनु सहज हुने छैन ।

श्रीलंका पछिल्ला खेलमा देखाएको प्रदर्शनकै आधारमा आत्मविश्वासका साथ मैदान उत्रिनेछ । शीर्षक्रमका ब्याटर राम्रो लयमा रहेकाले ठूलो योगफल खडा गर्ने लक्ष्य रहनेछ । पहिलो इनिङ्समा प्रतिस्पर्धात्मक स्कोर बनाउन सकेमा बलियो बलिङ आक्रमणका कारण त्यसको रक्षा गर्न सहज हुनेछ ।

पाथुम निसान्काललले अष्ट्रेलियाविरुद्ध शतक प्रहार गर्दै आफ्नो क्षमता प्रमाणित गरेका छन् र उनी टोलीका लागि प्रमुख हतियार हुनेछन् । दुश्मनथा चामीरा पावरप्लेमै आक्रमण सुरु गर्ने चामेराको सुरुवाती विकेटले खेलको दिशा बदल्न सक्छ ।

त्यसैगरी इङल्याण्डले ब्याटिङमा देखिएको कमजोरी सुधार्नुपर्ने देखिन्छ । यदि उनीहरूले पहिलो इनिङ्समै बलियो योगफल खडा गर्न सके, श्रीलंकालाई दबाबमा पार्न सक्नेछन् । स्पिन अनुकूल पिचमा उनीहरूको बलिङ संयोजन पनि महत्वपूर्ण हुनेछ ।

इङल्याण्डका लागि फिल साल्टको आक्रामक खेल्ने शैलीका कारण पावरप्लेमै तीव्र रन बनाउँदै खेलमा दबाब सिर्जना गर्न सक्छन् । त्यस्तै आदील रशिद मध्य ओभरमा विकेट लिन सक्ने हुनाले उनको भूमिका श्रीलंकाली ब्याटरलाई नियन्त्रणमा राख्न निर्णायक बन्न सक्छ ।

सुपर आठ चरणको यो प्रतिस्पर्धा निकै रोमाञ्चक हुने अपेक्षा गरिएको छ । पछिल्लो लयका आधारमा श्रीलंकालाई केही अग्रता देखिए पनि इङल्याण्ड जस्तो अनुभवी टोलीलाई कमजोर आँक्न सकिँदैन । दबाब, रणनीति र महत्वपूर्ण क्षणमा देखाइने प्रदर्शनले नै खेलको नतिजा निर्धारण गर्नेछ।

 

सम्भावित प्लेइङ–११

श्रीलंका: पाथुम निसान्का, कमिल मिशारा, कुसल मेन्डिस (विकेटकिपर), पवन रत्नायके, कमिन्दु मेन्डिस, दासुन शनाका (कप्तान), दुशन हेमन्था, दुनिथ वेल्लालागे, दुष्मन्था चामेरा, महीश थीक्षाना र मथेशा पथिराना।
इङल्याण्ड: फिल साल्ट, जोस बटलर (विकेटकिपर), जेकब बेथेल, टम ब्यान्टन, ह्यारी ब्रुक (कप्तान), साम करन, विल ज्याक्स, लियम डसन, जेमी ओभरटन, जोफ्रा आर्चर र  आदिल राशिद ।