रमपम चाउचाउमा न्यून गुणस्तर भेटिएपछि तत्काल बजारबाट फिर्ता गर्न विभागको आदेश

२९ पटक पढिएको

काठमाडौं – खाद्य प्रविधि तथा गुण नियन्त्रण विभागले गुणस्तर मापदण्ड पूरा नगरेको भन्दै एसियन थाई फुड्स लिमिटेडद्वारा उत्पादित रमपम चिकन सुपबेसको चाउचाउलाई तत्काल बजारबाट फिर्ता गर्न र बिक्री बितरण नगर्न निर्देशन दिएको छ ।

विभागले ६० ग्राम प्याकेटको ‘रमपम नुडल्स’ मा सरकारले तोकेको गुणस्तर मापदण्ड विपरीत देखिएपछि ती उत्पादन बजारबाट फिर्ता गर्न आदेश जारी गरिएको विभागले जनाएको छ।

विभागका अनुसार नियमित बजार अनुगमन तथा प्रयोगशाला परीक्षणका क्रममा ती खाद्य पदार्थमा गुणस्तरसम्बन्धी समस्या फेला परेको हो । उपभोक्ताको स्वास्थ्यमा प्रत्यक्ष असर पर्न सक्ने भएकाले तत्काल उत्पादन फिर्ता गर्न र आवश्यक सुधार गर्न सम्बन्धित उद्योगलाई निर्देशन दिइएको बताइएको छ।

मिति २०८२।१२।२३ मा उत्पादन भएको ब्याच नं. A/23C2 रहेको ६० ग्रामको रमपम चिकन सुपबेसको चाउचाउमा न्यून गुणस्तर फेला परेको हो।

विभागले उपभोक्तालाई समेत यस्ता उत्पादन खरिद गर्दा लेबल, उत्पादन मिति, गुणस्तर चिन्ह तथा आधिकारिक जानकारी हेर्न आग्रह गरेको छ । साथै बजारमा गुणस्तरहीन खाद्य पदार्थ बिक्री वितरण गर्ने उद्योग तथा व्यवसायीमाथि कानुनअनुसार कारवाही प्रक्रिया अघि बढाइने जनाएको छ ।
पछिल्लो समय बजारमा खाद्य वस्तुको गुणस्तरबारे प्रश्न उठिरहेका बेला विभागले अनुगमनलाई थप कडाइ गर्ने संकेत दिएको छ ।