साना तथा मध्यम व्यवसायका लागि वर्ल्डलिंकको नयाँ ‘बिज२४’ सेवा

१२ पटक पढिएको

काठमाडौँ । नेपालकै पहिलो व्यवस्थित ताररहित इन्टरनेट सेवा ‘बिज२४’ वर्ल्डलिंक कम्युनिकेसन्स लिमिटेडले साना तथा मध्यम व्यवसायका ग्राहकका लागि सार्वजनिक गरेको छ ।

साना तथा मध्यम व्यवसायका सञ्चालकसँगको प्रत्यक्ष छलफल तथा विभिन्न चरणमा गरिएको स्थलगत परीक्षणपछि ‘बिज२४’ तयार पारिएको कम्पनीले जनाएको छ । व्यवसायिक परिसरका हरेक कुनामा समान र भरपर्दो ताररहित इन्टरनेट पहुँच सुनिश्चित गर्नुका साथै बादलमा आधारित प्रणालीमार्फत सञ्जाल व्यवस्थापन गर्न सकिने सुविधा यसमा रहेको छ । ग्राहकका समस्या छिटो समाधान गर्न प्राथमिकतायुक्त सहयोग सेवासमेत उपलब्ध हुनेछ ।

वर्ल्डलिंकका बिक्री प्रबन्धक सतीश कृष्ण राजभण्डारीका अनुसार नेपालका धेरै साना तथा मध्यम व्यवसाय अझै घरायसी प्रयोजनका लागि तयार गरिएका इन्टरनेट सेवा तथा उपकरणमा निर्भर छन् । यसका कारण कार्यालय वा व्यवसायिक परिसरका केही स्थानमा ताररहित इन्टरनेट नपुग्ने, महत्वपूर्ण समयमा इन्टरनेट अवरुद्ध हुने र सञ्जालको अवस्थाबारे पर्याप्त जानकारी नहुने समस्या देखिने गरेका छन् ।

राजभण्डारीले यिनै चुनौती समाधान गर्न ‘बिज२४’ ल्याइएको बताए । उनका अनुसार यसले व्यवसायलाई भरपर्दो, व्यवस्थित र व्यवसायिक स्तरको इन्टरनेट सेवा उपलब्ध गराउनेछ। क्लिनिक, भोजनालय, साना तथा मध्यम आकारका मार्ट, स्टुडियो र सहकार्य कार्यालयलगायत विभिन्न व्यवसायको आवश्यकतालाई ध्यानमा राखेर सेवा तयार गरिएको उनले बताए ।

‘बिज२४’ले व्यवसायिक परिसरको आकार, भौतिक संरचना र आवश्यकताअनुसार उपयुक्त सञ्जाल निर्माण गर्न सहयोग गर्नेछ । एउटै राउटरमा मात्र निर्भर हुनुपर्ने अवस्थाको अन्त्य गर्दै परिसरका सबै क्षेत्रमा समान र भरपर्दो पहुँचका लागि आवश्यक उपकरण तथा सञ्जालको योजना उपलब्ध गराइने कम्पनीले जनाएको छ । इन्टरनेट सेवा व्यवसाय सञ्चालनसँग प्रत्यक्ष जोडिएकाले सेवा अवरुद्ध हुँदा व्यवसायमा असर पर्न सक्ने भन्दै ‘बिज२४’ ग्राहकलाई द्रुत तथा प्राथमिकतायुक्त सहयोग उपलब्ध गराइनेछ । ग्राहकले ०१–५९७००४० मा सम्पर्क गरी सहायता लिन सक्नेछन् ।

‘बिज२४’ राइज, ग्रो र प्रो गरी तीन तहमा उपलब्ध हुनेछ। यसअन्तर्गत २०० मेगाबिट प्रतिसेकेन्डदेखि १ गिगाबिट प्रतिसेकेन्डसम्मको उच्च गतिको इन्टरनेट सेवा उपलब्ध गराइनेछ । व्यवसायको आकार, कर्मचारी संख्या तथा आवश्यकता बढ्दै जाँदा सञ्जाललाई समेत विस्तार गर्न सकिने कम्पनीले जनाएको छ । यसमा सार्वजनिक स्थिर इन्टरनेट ठेगानासमेत उपलब्ध हुनेछ, जुन निगरानी क्यामेरा, विभिन्न सफ्टवेयर तथा अन्य सूचना प्रविधिसम्बन्धी सेवा सञ्चालनका लागि आवश्यक पर्न सक्छ ।

‘बिज२४’को वार्षिक शुल्क ३० हजार रुपैयाँबाट सुरु हुनेछ। यसमा १३ प्रतिशत मूल्य अभिवृद्धि कर थप हुनेछ । सबै तहका सेवामा व्यवसायिक स्तरको राउटर, सार्वजनिक स्थिर इन्टरनेट ठेगाना र प्राथमिकतायुक्त सहयोग सेवा समावेश गरिएको छ । यो सेवा नयाँ ग्राहक तथा सेवा नवीकरण गर्ने ग्राहकका लागि देशभर उपलब्ध रहेको वर्ल्डलिंकले जनाएको छ ।