कार्यालयलाई सुधारको एक्सप्रेस रोडमा गति दिंदै प्रमुख रजिष्ट्रार कृष्ण कुमारी श्रेष्ठ

१७३४ पटक पढिएको

कम्पनी रजिष्ट्रारको कार्यालयमा रजिष्ट्रारको भूमिकामा २०८३ ज्येष्ठमा पदस्थापन भएर कार्य आरम्भ गरेकी महिला कार्यालय प्रमुख रजिष्ट्रार कृष्ण कुमारी श्रेष्ठले आफ्नो एक महिने कार्यकालमै लोभलाग्दो सुधार गरेकी छन् ।

सुशासन र सेवाग्राहीमैत्री सार्वजनिक सेवा प्रवाहलाई मुख्य प्राथमिकता दिएर कार्यारम्भ गरेकी श्रेष्ठले एक महिनामै देखिने खालका सुधार गर्न सफल भएकी छन्।

वर्तमान सरकारको विचौलियाविहिन कार्यालय बनाउन कार्यालयमा हाजिर भएकै दिनदेखि प्रशासन शाखासँग आफै कार्यालयका प्रत्येक कार्यकक्षको अनुगमन गर्दै अनलाइन मार्फत हुने कार्यमा पनि दैनिक जसो कार्यालय धाइरहने विचौलियालाई कार्यालयको कोठा प्रवेशमा रोक लगाएर कार्यालयको वातावरणलाई नै शान्त बनाएकी छन् ।

कार्यालयको नागरिक बडापत्र, चेकलिष्ट, फाराम तथा निवेदन ढाँचामा तत्काल अद्यावधिक गरिएको छ। यस अघि सुशासन र सेवाप्रवाहमा सुधार गर्दै स्थानीय तहका जनप्रतिनिधि तथा वडा अध्यक्षमार्फत समेत सनाखत गर्न सकिने व्यवस्था लागु गरेका रजिष्ट्रार बलराम निरौलाको कदमलाई थप सशक्त बनाउँदै श्रेष्ठले यस कार्यलाई निरन्तरता दिएकी छन्।

कम्पनी रजिष्ट्रारको कार्यालले नेपाल सरकारको आर्थिक विद्येयक, २०८३ को दफा ४८ मा अनियमित तथा रुग्ण कम्पनीलाई लक्षित गरी व्यवस्था गरिएको राजस्व तथा जरिवाना छुटको व्यवस्थालाई कार्यान्वयनमा ल्याइसकेको छ। यसबाट हजारौं कम्पनीहरुलाई राहत मिलेको छ । सेवा प्रक्रियामा एकरुपता, स्पष्टता र कानूनी निश्चितता सुनिश्चित हुनेगरी निर्देशिकाहरुको पुनरावलोकन तथा एकीकरण गरिएको र सोको प्रमाणिकरणको कार्य अन्तिम चरणमा पुगेको जानकारी कार्यालयले दिएको छ । सरकारी डिजिटल प्रणालीहरुबीच सुरक्षित एपिआइमा आधारित अन्तरसञ्चालन हुने व्यवस्था गरिएको छ। आन्तरिक राजस्व विभागसँग सफ्टवेयर एकीकरणको काम भइसकेको र अव उप्रान्त कम्पनी राजिष्ट्रार कार्यालयबाट नै कम्पनीले पान नम्बर प्राप्त गर्न सक्ने व्यवस्था लागु भइसकेको छ ।

कार्यालयका सूचना अधिकारी तथा उप-रजिष्ट्रार राम प्रसाद ज्ञवालीले नयाँ रजिष्ट्रार कृष्ण कुमारी श्रेष्ठ सरकारको सुशासनको रफ्तारसँगै अगाडि बढिरहेको बताउँछन् । उनी भन्छन् “सुधारको सुरुवात साना साना कार्यबाट नै अगाडि बढ्ने र अन्ततः त्यो ठूलो सुधारमा परिणत हुने जापानी व्यवस्थापनको काइजेन मोडललाई कार्यालय प्रमुखले गहिरोसँग बुझेको हुनाले नै सुधारले गतिशिलता पाएको हो।”  कार्यालय प्रमुखको पद बहालीकै दिनमा शीघ्र सेवा प्रवाहमा जोड दिंदै कुनै पनि कर्मचारीको टेवलमा काम बाँकी रहन नमिल्ने गरी कर्मचारीले एक अर्काका कार्यमा समेत समन्वय र सहकार्य गर्न सक्ने मिल्ने गरी केमिस प्रणालीमा सुधार गरिएको छ । सेवा प्रवाह पूर्ण रुपमा डिजिटल र फेसलेस बनाइँदा सेवा प्रवाहमा हुने अनावश्यक मोलाहिजा वा चलखेलको समुल अन्त्य भएको छ।

कार्यालयका सबै कक्षहरुमा एक्सटिन्सन नम्बर प्रणाली लागु हुँदा सेवाग्राहीलाई सहायता कक्षबाटै सम्पर्क गराउन सहज भएको छ भने अर्कोतिर कर्मचारीहरुबीचमा पनि उपयुक्त आन्तरिक समन्वय स्थापित हुन सजिलो भएको छ । रजिष्ट्रार कृष्ण कुमारी श्रेष्ठ आफैमा युवा उमेरको नेतृत्व हुनाले युवा जोश र जांगरले कार्यालयमा समेत उत्साह थपिएको छ । उनी आएको एक महिनामै कार्यालयले घुम्ती हुलाक सेवा, गुनासो सुन्ने अधिकारीलाई थप स्रोतसहित जिम्मेवारी प्रदान, नियमित कर्मचारी बैठक, विचौलिया नियन्त्रणमा निर्मम पहल, फेसलेस प्रणाली, कार्यालयको सफ्टवेयर प्रणालीमा निरन्तर सुधार, नियमित सरसफाई व्यवस्थापन, निकायगत सफ्टवेयर एकीकरण लगायतका पक्षमा भएको आमूल सुधारले सेवा प्रवाहलाई थप प्रभावकारी बनाएको सहायक रजिष्ट्रार मनोहर थापाले बताए।

वर्तमान सरकारको मुख्य प्राथमिकता रहेको सुशासन र भ्रष्ट्राचार नियन्त्रणको कार्यमा कम्पनी रजिष्ट्रार कार्यालयको भूमिका अत्यन्त महत्वपूर्ण छ। विभिन्न आरोपित कम्पनीहरुको यथार्थ विवरण अनुसन्धानकारी निकायलाई समयमा उपलब्ध गराई अनुसन्धानका कार्यहरुलाई शिघ्रता प्रदान गर्दा अनुसन्धान र अभियोजनका कार्यहरुमा प्रभावकारिता कायम हुँदै गएको छ।

सरकारको शासकीय सुधार सम्बन्धी १०० दिनको १०० बुँदे कार्यसूची पुरा गर्ने एक सफल निकायको रुपमा हाल कम्पनी रजिष्ट्रारको कार्यालय पनि पर्न गएको छ।

ए आइ कल सेन्टरको शुरुवात गर्ने पहिलो सरकारी निकायको रुपमा पहिचान बनाइसकेको यो कार्यालयमा रजिष्ट्रारको रुपमा कृष्ण कुमारी श्रेष्ठको पद बहालीपछि उनको अबको ध्यान कार्यालयमा भद्रगोल अवस्थामा रहेको पुराना अभिलेखरुको व्यवस्थापनलाई वैज्ञानिक र वस्तुनिष्ठ बनाउने रहेको छ । “युवा र सुशासनप्रति प्रतिवद्ध कर्मचारीहरुको उपस्थितिले अहिले कार्यालयको शिर उच्च बन्दै गएको छ।” कार्यालयका सहायक रजिष्ट्रार नर बहादुर ठगुन्नाले बताए ।

 

थप समाचार:

स्थानीय तहले पनि अब कम्पनी दर्ता र शेयर खरिद गर्न पाउने, यस्ता छन् सर्तहरू

कम्पनी रजिस्ट्रारको कार्यालयले सञ्चालनमा ल्यायाे एआईमा आधारित कल सेन्टर

विद्युतीय सुशासनमा छलाङ मार्दै कम्पनी रजिष्ट्रारको कार्यालय