मलेसियामा मजदुरी गरेर फर्किएका शाहीको रहस्यमय ढङ्गले हत्या

५४० पटक पढिएको

तेजेन्द्र शाही,दैलेख – पश्चिम दैलेखको चामुण्डाबिन्द्रासैनी नगरपालिका–६ लैनचौरका २८ वर्षीय सुरेन्द्रबहादुर शाहीको हत्या भएको जिल्ला प्रहरी कार्यालय दैलेखका सूचना अधिकारी डिएसपी गणेशबहादुर बरालले गर्नुभएको छ।

२०७९ असोज ३० गते मलेसिया गएका शाही अन्तत ३३ महिनापछि गएको असार ३२ गते नेपाल फर्किएका थिए। उनले सुर्खेतमा आफ्ना भाईबहिनी र छोराछोरीसँग १० दिन बिताएर साउन १० गते बिहान मूलघर दैलेख जान हिँडेका थिए।

तर सोही दिन दुल्लू नगरपालिका–११ कयलकुनास्थित छामघाट खोलाको किनारमा उनको शव भेटिएको हो। शव फेला परेपछि प्रहरीले गरेको प्रारम्भिक अनुसन्धान अनुसार शाहीको घाँटी थिचिएको र टाउकोमा धारिलो हतियार प्रयोग गरिएको देखिएको छ।

शव पानी बग्ने खोलाको किनारमा भेटिएको थियो। परिवारका अनुसार शाहीका चार वर्षीय छोरा, छ र आठ वर्षकी दुई छोरी छन्। एक वर्षअघि श्रीमती डल्ली शाही गाउँकै अर्का पुरुषसँग विवाह गरी गएकी थिइन्। त्यसपछि शाहीले अर्की महिलासँग विवाह गर्ने सहमति गरेका थिए।

आफूलाई अविवाहित बताउने ती महिलाले मलेसियामै रहँदा शाहीसँग झन्डै चार लाख रुपैयाँ मगाएकी थिइन्। तर नेपाल फर्किएपछि ती महिलाले आफू विवाहिता भएको र एक छोरा रहेको खुलाएकी थिइन्।

सुरेन्द्रका बुबा बखत शाहीले भने, “छोराले टेलिफोनमा ती महिलाबारे सल्लाह माग्दा मसँगै कुरा गरेका थिए। मैले राम्ररी बुझेर मात्र निर्णय गर्नू भनेको थिएँ।” परिवारको आशंका अनुसार योजनाबद्ध ढंगले ती महिलामार्फत शाहीको हत्या गराइएको हुनसक्छ।

नेपाल फर्किएपछि उनले ती महिलासँग विवाहबारे कुरा गर्दा महिलाले भेट्न इन्कार गरेको र पछि आफू विवाहित भएको बताएकी थिइन्। हत्या सम्बन्धी अनुसन्धान जारी रहेको प्रहरीले जनाएको छ।

सोधपुछका लागि ती महिलालाई नियन्त्रणमा लिइएको छ भने सुरेन्द्रको शव पोष्टमार्टमका लागि दैलेख अस्पतालमा राखिएको छ। प्रहरीले घटनाको प्रकृति र पृष्ठभूमिका आधारमा विस्तृत अनुसन्धान अगाडि बढाएको जनाएको छ।