हुप्सेकोट र बौदीकालीका नौ सय कृषकलाई फलफूलका बिरुवा वितरण

५५ पटक पढिएको

विष्णु गौडेल, कावासोती साउन ३१ – नवलपुरको हुप्सेकोट गाउँपालिकामा अदुवामा आधारित कृषि वन प्रणाली विकास गर्ने उद्देश्यले किसानहरूलाई विभिन्न प्रजातिका बिरुवा वितरण गरिएको छ ।

सिआरएस नेपालको आर्थिक साझेदारीमा हिकोडेफको आयोजना एवं हुप्सेकोट गाउँपालिकाको समन्वयमा स्थानीय ४५० जना कृषकहरूलाई फलफूलका बिरुवा वितरण गरिएको हो ।

हुप्सेकोट गाउँपालिकाको वडा नं.२,४,५ र ६ का चार सय ५० घरपरिवारलाई एक हजार नौ सय कफी, तीन हजार कागती र एक सय ५० वटा सुन्तलाको बिरुवा वितरण गरिएको परियोजना संयोजक प्रशान्त रिजालले बताउनु भयो ।

मध्य पहाडी क्षेत्रमा क्षयग्रस्त भू–परिवेशमा दिगो तथा सुधारिएको कृषि प्रणाली विकास गर्दै जैविक विविधताको प्रवद्र्धन, पारिस्थितिक प्रणालीको संरक्षण, साना कृषकको जीवनस्तर उकास्ने र आर्थिक–जीविकोपार्जन सहनशीलता अभिवृद्धि गर्न यो कार्यक्रम सञ्चालन गरिएको संयोजक रिजालले जानकारी दिनु भयो ।

परियोजनाले घरदैलोमै पुगेर कृषकलाई प्राविधिक तथा सामाजिक सहयोग समेत गर्ने भएको छ । यसले अदुवा उत्पादन र बजारीकरणमा समूहगत प्रवद्र्धन गर्ने तथा कृषि शाखा र पालिकाका कार्यक्रमसम्म कृषकलाई जोड्ने पुलको भूमिका खेल्ने लक्ष्य लिएको जनाइएको छ ।
अदुवा खेतीमा आवश्यक ओसपुग र फलफूल खेती विस्तारले कृषकको आयआर्जनमा ‘पेन्सन’ जस्तै दिगो स्रोत सिर्जना गर्ने र कार्बन शोषणमार्फत वातावरणीय दिगोपनामा योगदान पु¥याउने विश्वास गरिएको संयोजक रिजालले बताउनु भयो ।

कृषकहरूलाई बिरुवा हस्तान्तरण गर्दै हुप्सेकोट गाउँपालिका अध्यक्ष लक्ष्मीदेवी पाण्डेले पहाडी क्षेत्रका जनालाई आत्मनिर्भर बनाउन यो कार्यक्रम सहयोग सिद्ध हुने विश्वास व्यक्त गर्नु भयो । भिरालो जमिनमा अदुवा मात्र खेती गर्ने किसानले अव कागती,कफी,सुन्तला लगायतका बिरुवा समेत लगाएर आम्दानी गर्न सक्ने उहाँले बताउनु भयो । आगामी पाँच वर्ष सम्म सञ्चालन हुने यस परियोजनाले कृषकहरूलाई बिरुवा रोप्ने देखि उत्पादन बिक्री गर्ने सम्मको सम्पूर्ण प्रक्रियामा प्रत्यक्ष सहयोग गर्ने बताउनु भयो ।

हुप्सेकोट गाउँपालिका उपाध्यक्ष पूर्ण सिङ रानाले परम्परागत कृषि गरिरहेको अवस्थामा बहु उपयोगी कृषि तर्फ पहाडी क्षेत्रका जनालाई जोडन पाउनु ठुलो सफलता रहेको बताउनु भयो । बहु वर्षीय  उत्पादनमा कृषकलाई जोड्दा आर्थिक स्तरमा समेत फड्को मार्न सकिने उपाध्यक्ष रानाले बताउनु भयो ।

नवलपरासी(बर्दघाट सुस्ता पूर्व)को हुप्सेकोट र बौदीकाली गाउँपालिकामा सञ्चालन हुने वातावरणीय दिगोपनका लागि लगानी र क्षमताहरूको सुरक्षा र संरक्षण (SPICES) परियोजना मार्फत दुई पालिकामा कुल ९०० जना कृषकसँग प्रत्यक्ष सहकार्य हुने जनाइएको छ । यसमार्फत कुल तीन हजार एक सय कफी, पाँच हजार कागती र तीन हजार पाँच सय सुन्तलाका बिरुवा कृषकलाई वितरण गरिएको छ।

बिरुवा वितरणका लागि वडा, पालिका र कृषि शाखासँगको समन्वयमा अदुवा खेतीमा संलग्न समूहलाई प्राथमिकता दिइएको परियोजनाका कृषि प्राविधिक समीर लामिछानेले बताउनु भयो । परियोजना हिमालयन सामुदायिक विकास मञ्च (हिकोडेफ) मार्फत सञ्चालन गरिएको छ ।