कलाकार पाँडे ले ‘झरीपछिको इन्द्रेणी’ फिल्म निर्देशन गर्ने, मुहूर्तसँगै छायांकन सुरु

९० पटक पढिएको

चर्चित कलाकार अर्जुन घिमिरे (पाँडे) ले पनि फिल्म ‘झरीपछिको इन्द्रेणी’ बाट फिल्म निर्देशनमा डेब्यु गर्न लागेका छन् ।

यो फिल्मको आज बिहीबार ललितपुरको धन्वन्तरी बाराही मन्दिरमा शुभ-मुहूर्त गर्दै छायांकन पनि सुरु गरिएको छ ।

बाबु-छोराबीचको कथामा बन्न लागेको फिल्ममा निर्देशक घिमिरेसहित गणेश उप्रेती, दीपाश्री निरौला, रमेश उप्रेती, निर्मल शर्मा, प्रियाना आचार्य (मुन्नी) लगायतको अभिनय रहनेछ ।

४५ दिनको सेड्युलमा काठमाडौं, ललितपुर र भक्तपुरमा छायांकन हुन लागेको फिल्ममा कुमार व्यञ्जनकार (कुमार बेन)को कथा तथा अर्जुन घिमिरे र विशाल घिमिरेको पटकथा रहेको छ ।

फिल्मलाई बुद्ध थापाले छायांकन र सुशील कडरियाले निर्माण गर्नेछन् । फिल्मको एउटा गीतमा काठमाडौं महानगरपालिकाका मेयर बालेन शाहको र्‍याप रहने जनाइएको छ ।

यसअघि ‘सक्किगोनि’ सिरियलको निर्देशन गरेका अर्जुनले ‘झरीपछिको इन्द्रेणी’ आफ्नो ‘अपग्रेड भर्सन’ रहेको बताएका छन् । उनले फिल्मबारे भने, ‘यो पूर्ण फेमिली ड्रामा हो । कुनै पनि घर-परिवारमा भइरहने घटनाक्रम, जुन हामी सबैले भोगेका छौं, त्यसलाई नै समेटेका छौं ।’ फिल्ममा अग्रज कलाकारहरुसँग सहकार्य गर्न पाउँदा आफूले भाग्यमानी महसुस गरेको उनले बताए ।