कविता- ब्रम्हनालमा अन्तिम निश्वास र सी.जी.को मृत्युमा रमाउनेहरु

२८६ पटक पढिएको

सी.जी. “निर्मल श्री”-

सुन्दैछु अचेल !
मृत्यु चाहेर पनि आउँदैन
नचाहँदा नचाहँदै पनि
मृत्यु आईरहेको हुन्छ
पलपल निमेष निमेष
क्षितिजभन्दा टाढाबाट
नियालीरहेको मृत्युका डोबहरु
शनैः शनैः बाँचिरहन चाहने
जिजिविषालाई समेत तिलाञ्जली दिई
बाँच्न चाहनेहरुलाई
मृत्युशैयाको नजिक पुर्याउने
अनि मृत्युको बाध्यतालाई
आत्मसात गर्न चाहनेहरुलाई
सकि नसकि
बाँच्न विवश बनाउने निर्दयी मृत्युलाई
दुत्कार्न चाहान्छु र भन्न चाहान्छु –
“जति मार्नु मारिस् निर्दोष र निरापराधलाई
जो बाँच्न चाहान्छ उसलाई मार्दैछस् तैंले
अनि जो मर्न चाहान्छ उसलाई
जीवन भीखमा दिईरहेछस् ।
तेरो मृत्युको कानूनलाई
खुलेयाम विरोध गर्दै भन्दैछु –
“आइज ! सी.जी.लाई मृत्युशैयामा पुर्याई दे
ब्रम्हनालमा अन्तिम निश्वास लिएर
जीवन्को अन्तिम महायात्राको बाटोमा
आफ्नो पाइला अघि बढाउन चाहान्छु म…………………………..१

आर्यघाटमा गएर हेर्दा
ब्रम्हनालमा सुताईरहेको कुनै मानव
कति लालायित हुँदो हो !
सम्पत्ति कमाउन नसकेको परपीडामा
कति कुण्ठित हुँदो हो !
चाहिनेभन्दा बढी कमाएर पनि
चाहेको इच्छा पूरा गर्न नसेकोमा
समाजमा तिरस्कृत थियो कि कोही ?
समाजमा सँधैं आवश्यक थियो कि कोही ?
तिरस्कृत हुँदाको तिरस्कारको भावना
सुन्नु परेको छैन उसले
मरेर ठिक्क भयो !
यस्ता मान्छेको आवश्यकता थिएन भन्ने
सुन्नु परेको छैन उसले
समाजमा आवश्यक भएको कुरा
सुन्न पाएको पनि त छैन उसले
कठै ! सबैको मनको चाहना थियो !
सबैको श्वास थियो ! धड्कन थियो !
यो समाजलाई आवश्यक थियो भनेर
आफ्नो मृत्युमा शब्दश्रद्धा र
चिरशान्तिको कामना दिएको समेत्
सुन्न पनि त पाएको छैन उसले
एउटै मृत्यु तर
फरक पीडा र प्रतिक्रिया
कसैलाई सम्पत्ति बढ्ने आश
कसैलाई जीवनभरि
पीडा र एकान्तमा बस्नुपर्ने
सन्त्रासमा परिकल्पका कायाहरु
ब्रम्हनालको अन्तिम निश्वासमा
अवचेतन तन् निर्जीव मुर्दा भएर
चेतन मन ब्रम्हाण्डमा
लीन भैरहेको यस्तै
ब्रम्हनालको स्वप्निल संसारमा रमाउन पाउने
आनन्दको वर्णन
कसरी गर्न सकिन्छ होला र …………………………..२’

जन्मिन्छ मान्छे
केवल मर्नको लागि
जीवनमा एकपल्ट मात्रै मर्ने
मृत्युको लागि
पटक पटक मरेको त्रास
मर्नको त्रास
र बाँच्न पाउने जिजिविषाको लागि
मर्नुभन्दा बढी गर्नु पर्ने
जीवन् संघर्षका अनगिन्ती आयामहरुलाई
अनेकन् जालझेल र प्रपञ्चबाट
सञ्चालित गर्नुपर्ने जीवनभन्दा
ब्रम्हनालमा कल्पहिन
अन्तिम निश्वास लिनपाउने
स्वर्गीय आनन्दलाई खुलेयाम आव्हान
गर्न मन लागेको छ
त्यसैले आऊ !
सी.जी.को मृत्युमा रमाऊ
सी.जी.को मृत्युमा रमाउनेहरु हो !
ब्रम्हनालमा अन्तिम निश्वास लिएर त हेर
बाँच्ने र। मर्ने जीवन संघर्षभन्दा
यो आर्यघाटको ब्रह्मनालमा सुतिरहेको
चिरनिद्राको स्वर्गीय संसार
कति आत्मिक र स्वच्छन्द छ ……………………………..३

टीकापुर १, कैलाली
हाल : काठमाडौ